Russia chuan Europe-a nuclear power station lian ber, Ukraine-a mi chu laipuia an kah hrep hnuah an la.
Zaporizhzhia plant hi Russian sipaiten an kah hnuah nasa takin a kang zui niin Ukrainian thuneitute chuan an sawi.
UN hnuaia nuclear lam viltute chuan kangmei chhua avang hian radiation level a san phah lo va, reactor himna pawh a derthawn phah lo niin an sawi.
Khawvel ram hruaitute chuan Russia hian khawmualpui pum dinhmun derthawngah an dah niin an sawi a, Ukrainian president pawhin Russia chu ‘nuclear terror’ tiin a sawi.
United States President Joe Biden chuan plant hnaiha a sipaite a chettirna chu titawp nghal turin Moscow chu a ti a. Canadian Prime Minister Justin Trudeau pawhin Russia atanga ‘beihna rapthlak tak’ chu ‘a rang thei angin a chawlhsan tur a ni’ a ti bawk.
UK Prime Minister Boris Johnson chuan hetiang beihna hian ‘Europe pum himna a tiderthawng’ niin a sawi a. Heng hruaitute hian Ukrainian President Volodymyr Zelensky chu phone-in an be theuh hlawm a ni.
Zelensky chuan nuclear plant beih hian kum 1986-a nuclear chhiatna rapthlak ber, Chernobyl chhiatna ang let ruk zet a thlen thei niin a sawi.
“A puak a nih chuan engkim tawpna a ni dawn a, Europe tawpna tur a ni mai,” a ti.
Russian defence ministry erawh chuan Ukrainian chet dan demin finfiahna engmah awm lovin chhiatna tam tak chu an tihah an lantir niin a sawi.
Video darhah chuan nuclear plant-ah hian zan lamah thil puak êng tak tak awmin meikhu chu van lamah a invawrh chho nasa hle.
Plant hung chhunga inte chu engin emaw kah a nih hnuah a kang a; mahse, reactor a ni lo niin International Atomic Energy Agency-a hotupa, Rafael Grossi chuan a sawi.
Plant himna chu kangmei avangin a chhe lo va, radioactive material engmah put a awm lo niin a sawi bawk.
Zaporizhzhia-a thil thleng chuan ‘a pangngai angin, pangngai si lovin’ a awm tih a sawi a. Hei hi a pangngai ang renga kal siin awmze awm lovin a awm a tihna a ni.
IAEA hian a hmain boruak thlirin thil a thleng thei niin an hria a, an vil reng tih a sawi bawk.
Plant hi Ukraine khawpui, Kyiv chhimchhak lam km 550 vela hlaa awm a ni a, an rama electric an hman 20% vel pe chhuaktu a ni a. Dnieper lui kama awm niin Russia-in an lak tawh tho nia sawi, Kherson khawpui bul lawka mi a ni.
Russian sipaite hian Chernobyl nuclear plant pawh an lo la tawh a, hei hi mihring chanchina nuclear chhiatna lian ber a thlenna hmun kha a ni.
Russia hian a thenawm ram hi nasa zawkin a beih chhunzawm zel a. Thil thleng tam tak a awm belh zel.
Chhim lama lawngchawlhna khawpui, Mariupol-ah chuan Russia-in laipuia a kah nasat em avangin tui leh power supply a awm thei tawh lo.
Hmar lamah Chernihiv leh Kharkiv khawpuiah chuan inkahna nasa tak a la thleng reng a. Hetih lai hian Sumy khawpui pawh Russian sipaiten an hual vek tawh nia sawi a ni.
Russia chuan BBC hnuaia Russian Service bik chu an block a, hei hi an ram parliament-ah Ukraine an rûn mek chungchangah ‘thu dik lo’ thehdarha puha block-na tur dan an siam vang a ni.
Kar hmasaa an thenawm ramin an rûn atangin Ukrainian maktaduai chuang chuan sahimna zawngin an chenna in an chhuahsan tawh.
Khawvel ram hrang hrangin an chet dan avanga an hrek hnuah pawh Russian President Vladimir Putin a la zal lo va, an beihpui thlak chu ‘ruahman angin’ an kalpui zel dawn tih a sawi.
Khawthlang ramten thuchhuah rum tak tak an neih avangin an nuclear ralthuamte pawh hmang mai turin an kau tan niin a sawi bawk.
Khawthlang rama minister-te chuan Zirtawpni khan Brussels khawpuiah thutkhawm hmanhmawh kovin Ukraine an thlawp dan tur an sawiho.
UK Foreign Secretary Liz Truss chuan an thutkhawm hma hian ‘inkawmhona lian ber’ a awm tur thu leh an thawhpui ramte nen ‘Putin-a indo khawlte hrek beh’ dan an dap dawn a, Russian economy chu na lehzuala hrek dan tur an ruahman dawn niin a sawi.