Russia-in Ukraine a rûn meknaah Ukrainian deputy prime minister chuan civil mite awmna pawh an kap hreh chuang lo va; damdawi in, nursery leh sikul pawh an vaihma vek niin a sawi.
Olha Stefanishyna chuan BBC hnenah Ukrainian sipaiten khawng taka an lo chhan let hnuah Russian-te hian civilian-te lakah beihpui na takin an thlak zui ta niin a sawi.
Russia fian ‘ruahmanna firfiak tak’ duangin boruak atang bakah lei lam atangin nasa takin an che niin a sawi.
World Health Organization pawhin damdawi in hmunte chu beih an ni ngei tih a lo sawi ve tawh bawk.
“WHO chuan Ukraine-a damdawi in eng emaw zat chu beih a ni tih a finfiah a, hei hian thihna leh hliam tawrhna tam tak a thlen,” tiin WHO Director-General Tedros Adhanom Ghebreyesus chuan Pathianni khan a sawi.
British sorkar pawhin Russia hi mihring chenna lai hmun tam takah a tum niin a lo puh tawh bawk.
“Russia hian tun hma, kum 1999-a Chechnya leh 2016-a Syria-a a tih thin ang bawk hmang lehin boruak leh lei lam atangin nasa takin a bei a ni,” tiin UK hian an intelligence report a sawi.
Inrinni khan UN hnuaia a viltute chuan February 24-a Ukraine rûn a nih atang khan civil mi 351 an thi tawh niin an sawi a; mahse, a tak taka thi erawh hei aia an tam daih tur thu an sawi bawk.
UNHCR pawhin Russia-in a rûn hnuah mi maktaduai 1.5 velin Ukraine an tlanchhuahsan tawh tih a sawi bawk.
Russia erawh chuan civil mite an bitum nia puhna chu nasa takin an pha ve thung a, an tumte chu ‘special military operation’ hmangin Ukrainian ‘nationalist’ leh ‘neo-Nazi’ te an nih thu a sawi ve thung.
BBC TV-a Sunday Morning programme-a an kawmnaah Stefanishyna-i chuan Russia sipaiten tactic an ruahman chu Ukraine khawpui lian tin a thleng mek niin a sawi.
“Damdawi in an kap a, kindergarten leh sikul an kap a, chenna in pangngai pawh an hmaih chuang lo,” a ti a. “Heng hi a tak taka thil thlen dan a ni,” a ti.
Ukraine chuan Russian Federation-in firfiak taka ruahmanna a siam a hman chhuahna an tuar leh mek niin a sawi bawk.
Stefanishyna-i hian an lo beih let nasat avangin Russia hian an sipai leh an hmanrua tam tak an hloh ve tho niin a sawi a; mahse. ‘heng hian a dang kir zo chuang lo’ niin a sawi.
“Heng thilte hian na zawka che turin a fuih phur sauh sauh a ni,” a ti bawk.
Civil mite leh an hmunte – sikul leh damdawi in beih hi Geneva Conventions-in a phal lo a ni a, hei hi khawvel ram zawng zawngin indonaa an zawm tura hming an ziah hnan a ni.
Ukraine-a Russia-in kut a thlaknaah hian WHO bakah NGO dangte pawhin civil mite hi an bei ngei niin an sawi hlawm.
Amnesty International chuan civil mite kaihhnawih tam tak beih a nih thu hi an sawi a. Kindergarten leh nursery kah a nih thu leh ballistic missile-in damdawi in a kah fuh te pawh a awm thu an sawi.
Hetih lai hian Pathianni khan Russia chuan an rama indo duh lohna lantirtu mi 1,000 zet an man niin Ovd-Info pawl chuan a sawi.
President Volodymyr Zelensky chu an thenawm ramin an beihnaah a chan chhe zawkah tang mah se tawlh a tum lo va, a mite chu Russian-te lo bei chhunzawm zel turin a ti.
Inrinni zana Kyiv atanga thuchah a sawiah Zelensky chuan tun hi beih let hun a nih thu a sawi.
“Kan chhuaha kan khawpuia ramhuai sual lo lutte hnawh chhuah hun a ni,” a ti.
A thu sawinaah hian United States President Joe Biden-a chu indo thlawhna pea pui turin a ngen bawk.
US thuneitute pawhin Poland-a hruaitute kawmin Warsaw-in Ukraine hnena MiG fighter jet eng emaw zat a pek dan tur an dap nia hriat a ni.
Poland hian Soviet hun laia hman thin fighter hi zawi zawiin a hluihlawn tan mek lai a ni a. Ukraine hnenah hian hmantir a tum ril;ru mek a, pilot a neihte chuan khawthlang ram siam indo thlawhnate an khalh thiam lo a ni.
Report thenkhatah chuan US siamte nena inthleng kualte pawh sawi a ni.
Russia-in Ukraine a rûn hi ni 11 a kal tawh a. Hmun tam takah inkahna lian tak tak thlengin Moscow hian Ukrainian khawpui lian zingah Kherson chauh an la la a, Zaporizhzhia nuclear power plant pawh Zirtawpni khan an la bawk.
&&&&&