- Zirsangkima
Ka ngaihtuahna chu a kal thui kher mai. Engati nge he lai Delhi tlánga hetiang tawng tura ka thlen thlâk? He hmeichhia hian ka nun hi a ti-‘mahse’ zo vek tawh a, a tihngaihna tak pawh ka hre tawh lo. Mipa chu ka ni la ni ngei alãwm; mahse, ka ‘pà’ tlat tawh lo! Ka kianga awma ka duh tawh loh hi ka ûm \hìn a, ka hmuh hreh ber hi ka zawng ruai ruai \hìn. Zan tin Delhi khaw lum hnuaia thlan tui luang kára mittui leh zêl luantíra min vèl \hìntu hi ka pan lui \âlh \âlh \hin a nih hi!
Hetah, hmânah…
Delhi-ah hian kum nga chuang ka awm ve ta. Juleen-i hi MBA ka zir laiin kan junior a ni \hìn. A hming a\ang hian \henkhat chuan Punjabi a ni tih in hre maiin ka ring. A hmel\hatzia chu sawi ngaiah ka ruat lo e. Hnam induh ve tak, Punjabi nula chu eng tin tin emaw ka kàwm nél thei tlat mai a. A tìr chuan a ze dik tak—a ‘zahzum zia’ a chhuah \hìn. Mahse, kan inkàwm rei tial tial a, \hian dang kan ngai lo tial tial a, engtik laiin nge ka hmangaih tih pawh inhre hman loin ka inrin hmá-in a zùn chuan nghet takin min phuar dèr a ni.
International Management Institute (IMI) Delhi a\anga MBA ka zir chhuah hlimin HDFC Bank-ah hnà ka hmu ve hlauh mai. Campus ka chhuahsan dáwn ní-a kan inhmuh \um phei kha chuan in\hen hlen tùr ang maiin kan inngai a, ka áwma beiin a \ap hliam hliam reuh a. Nia, kei paw’n in\hen hlen ka hlauhzia leh ka hrehzia kha … ka zêp lo—ka hnìm vezia kha!
An awmna, an véng Greater Kailash–2 kiang lawkah ni tin office ka kai thei ta hlauh a. Engtin tin emaw inhmuhna remcháng kan nei thei hlauh \hìn. Chutiang hunah chuan kan hlim dun \hìn kher mai. Mahse, khatih laia hlim ve êm êm nia ka hriat \hin kha alãwm, tûn hnua ka hriat chhuah leh apianga min vêl \hìntu ni ta chu!
Zanriah hnuhnung
Tlai dar 6.00 a pèl tawh a, hnaah ka la buai hle mai a. |hiante hàw hnu-ah pawh ka \hianpa Rajesh-a nèn office-ah kan la awm. Ka phone a rawn ri keuh keuh a. SMS ka dawng—‘Zanin kha aw … Ka nute chuan an phal dawn lo chiang a, an hre thawi deuh lehnghâl! Mahse, an hre thawi tih ka hriat khán ka ngai zual tlat che. Zanin paw’n ka \hiannu birthday party-a kal tùr angin ka insawi a nia,’ tih hi sap\awngin a lo inchhu a. Min rawn thawntu chu tunge a nih ka hai lo.
Vawiin tlai khan kan inhmu zuai a; kan office cafeteria-a ka awm laiin a rawn lang hlawl a. Minute 15 vêl kan \hu dùn a. Ka rin loh pui pui thil hi a rawt leh nulh \hin a. Vawiin tlaia kan inhmuh \um paw’n zanina dinner eipuiah min sáwm a ni.
Dik tak chuan amah hlata awm hi duh tak zet tawh. Ka taksa hi chuan a’n hlat lui ve \hin tak nâ a, ka chhúngrila keimah tho hian a pan leh dû dû \hin a; ami sàwmnate pawh hi ka hnial tak tak thei lo a nih hi! Amah ka hlat duh chhan hi ka hmangaih loh vàng a ni lo a, kan inkâra ‘kak’ awma hi hai theih a ni tawh mawlh si lo a; mahse, min ti â zo laklawh tlat tawh si a!
Ruby Tuesday restaurant chu zàn dar 9.10-ah kan thleng a. Kan chàwl \hang bawk a; a thawktute paw’n min hre chiang tawh kher mai. Khualchhawn chuan min lo nuih saih pahin, ‘Table ngaiah maw?’ min lo ti a. Lú kan bu nghat a.
A dân ngaitê bawkin maw?
Ruby Tuesday hnung lama mi pahnih \hutna tùra dawhkân an hùn lam chu kan pan leh a ni. A tih fo \hin angin vawiin lama ka hnathawhte min zâwt leh, ka thu sawi tàwp lamah chuan, ‘…Buai taka hnà ka thawh lai paw’n ka mitthlaah ka hmu reng che a sin,’ ka tih zauh a\ang chuan a awm dàn a inthlâk danglam leh vek ta! A mitthlá-ah mi dang a rawn inlár ve leh a ni ngei ang!
Ka thu sawi chu a ngaihthla zui miah lo tih hriat tak hian min ngawihsan leh daih tawh a. Ka mitmu-a a hmél hmuh tum ang ziazánga uluka min melhtu chuan, hmun danga awm, mi dang a hmu leh daih tawh! Ka \awng lui zêl a; mahse, ka hmaa \hu chuan ka thu sawi lai chu a them pawh a hre lo tih ka hai si lo!
Hmânah eng maw?
Zàn dar 9:25 a pêl tawh a, restaurant-a an khàwnvàr chhit èn pawh chu an ti thim diar diar \an tawh a, hmél erawh a inhmuh theih tho a, a romantic kher mai. Mahse, dawhkàn pakhat kîla mi pahnih \hu dùnte chu mél za tam kára awm ang mai an ni a, an inkár chu zauh naménin a zau lo. Tûn hi a vawi khatna a ni lo tih ka hria. Eng vàng nge? Tu vàng nge? A pawi ka sawi em ni? Chûng zawng zawng chu ka ngaihtuah vek tawh. Kohkìr theih loh ‘hmànlai’ a ngai a ni!
Kei hi min ngai lo ka ti lo; mahse, chiang taka a mit ka en apiangin a mitah ka inhmu ngai rêng rêng lo a; ani paw’n ka mit meng a\anga ka hmangaihzia a hmuh apiangin ka mitah mi dang a hmu \hin! Tìtî mai maia kan inkawm laia a mit meng ka en cháng chuan ka inhmu ve \hin; mahse, ka hmangaih a ni tih a hriat chhuah apiangin a mitah mi dang hmél ka hmuh ziah bawk!
A hriat loh hlànin kan intawn hmaa a chanchin ka chhui rù a. A \hian hlui, ka kawmte zárah Delhi tláng ka chuan ve hma thil pawh ka hre ve. Chûng thil chu atân chuan hmânlai thil a ni lo a; hmangaihtu mit meng a hmuh apiangin he hmânlai hi a hmu thar leh ziah \hin a ni.
A hmânlai nun chu eng nge? Eng dang a ni lo, ngaihzâwng a nei tawh a. Kîr leh tawh ngai lo tùr a ngaihzâwng chu a ‘ngaizáwng’ tak zet a, theihnghilh a tum nasat poh leh a ngaihna a zual \hìn. Chu a ngaihzáwng hlui zùn chuan a sal bet tlat a, zalèn tumin nun hi a sualin a sual ve \hìn.
Chu thil ka hriat chhuahna chu eng dang a ni lo a; hla pakhat an ‘play’ rî a hriat apiangin min tlàn chhiatsan ziah \hin vàng a ni.
‘Mahse,’ ka ti fan fo a …
A hriat záwngah zawng ka hre chiang ve viau mai. Kum 16 mi a nihin hmangaihna a tem a, chu hmangaihna chuan a phuar zui a—chhuak thei tawh lo tùrin. Mahse, kum rei lo te hnu-ah a bialpa nèn chuan an in\hen a. A bialpa chuan a bàn a ni lo; ani paw’n a bàn rêng rêng lo. A bialpa tán chuan ani chu a hlu thlâwt a, a dam chhúnga a ngaihzáwng a ni hlen ta a ni!
Zan khat an lèn chhuah \umin an inhnial a ni àwm a. Ani chuan thil engkim sawi tlang vek puiah sáwmin Nehru Park-ah an inkàwm … a ni lo, an inhnial a ni zâwk. Juleen-i chuan tih tauhsan zuiin auto rickshow a la a, a hmangaih êm êm chu a hàwsan ta a ni. Hmangaihte laka thinrim emaw tih tauh emaw hi thil thiang lo a ni lo; kan hmangaih miah lohte laka thinrim tak tak hi chu thil har tak a ni. A hmangaih vàng a ni, thinrima Nehru Park chhuahsana zanlai dár 12 dâwn hnaiha auto rickshow-a a hàw tâk daih ni.
Chumi zân chuan a mu lo. Zíng dár nga vêlah a muhìl ve diar diar ni àwm e. Mahse, zîng dar 7.00 pelh hretah a cell phone a rawn ri a, zan tlaivàrtírtupa phone call chuan a kai tho lo thei lo. Harh chu a harh ngei a; mahse, a la duh lo, a thinrim a la reh tlat lo. Mahse, phone chu chhum lo chat loin a ri reng mai si a; thinrim zetin a’n ‘Hello’ a; mahse lo chhángtu chu ‘kha pa’ kha a ni hauh lo!
A dam chhúnga a inchhìrna siamsaktu tùr thu chu, phone-a amah rawn betu chuan a hrilh ta a nih chu!
‘ … a ruang hi police lamin an hlâwm mék a, i hmu duh a nih chuan Safdarjung hospital-ah lo kal rawh. Message rawn thawn che a tum, a thawn hman tâk loh kan hmu a, eng dang vak a inziak lo… I hming hi vawi sawm leh pahnih lai a chhu thla a, a hnuaiah, “Ka dam chhûngin ka hmangaih a…” tih zawng a ni mai!’
He thil râpthlâk tak hi kum kaw liam taa thleng kha a ni tawh a; mahse, atán chuan vawiina thil thleng ang mai a la ni. A hriat chhuah zinzia te, a la hmangaihzia te, kokîr thei si loa a la koh nasatzia te, a liam hlen tawh a ni tih hre reng chunga a la zawn nasat \hinzia te, a la hmuh fo thu te … a zawng zawngin, a hriat ang chu ka hre ve vek vek tawh. Mahse maw, “mahse” ka la ti fan fo a—‘liam tawh pa’ a thlah thei lo ang thoa ka thlah theih bik loh vàng a ni!
Theih tâwp chhuah a sâwt si loh chuan…
A nun hlui vàngin vawi tam ka mualphopui tawh a, a hmuh leh tawh ngai loh tùr a ngaih avànga a ‘eng emaw’ leh \hin cháng paw’n “mahse” ka ti fan fan \hin. A hriat chhuah fo \hina kha ka dem thiang lo. Mahse, tih tùr nei vein ka inhria—liam tawh chu hmuh theih a ni tawh lo a, tui baw hnu chu a ruh leh theih tawh ngai loh a ni, tih tal hi chu hre ve se ka ti a, chumi hriattír tùr chuan theih tâwp ka chhuah ve a; mahse, thil namai zawng a ni hauh lo mai.
A beiha beih fé a ngai a, a rilru hneh tùr chuan hun pawh a lo duh rei kher mai. A ní záwnga chhiar chi a lo ni rêng rêng lo mai a, a kum záwnga chhût a lo ngai ta hial. Mahse, tûn hnai mai khan làwmna mak tak mai ka nei a—amahah nun danglam ka hmu a ni.
Kár hmasa lam khán a zia a thlâk tawhzia ka hmu a; zalènna a tawng ve \an ta, tih pawh hai rual lohin a khawsaziaah ka hmu thei. Ka \awng\ainate chhànin a awm a ni tih ka hria a. Zanin tlai ngei paw’n kan office cafeteria-ah kan inkàwm a, a ze danglam tawhzia chu ka hmu chiang khawp mai. Chuti ni lo se, zanin hian he Ruby Tuesday-a zanriah kîl tùr hian min sáwm malék ang. A duh ang taka nun thara nun a hman chu ka duhsak tak zet a, chumi ti tûr chuan ka peih loh thil pawh ka peih a ngai a ni.
Làm tàwp zàn a thleng ta a!
Ka \awng mawlh mawlh a, vawiin lama a ze danglam ta ang erawh ka hmu tawh lo nâ a, beisei erawh ka la nei. Ei tûr kan lam hnu chuan a hlim leh a hlim loh ka zâwt zui a, ‘Ka hlim. Nuam ka ti,’ a ti a. A âw erawh a ban hle mai!
Theih tâwp ka chhuah a ngai a ni. A nun hlui, ‘kha pa’ thlarau sala a tàn ka phal tùr a ni lo a, a hlimna tur ka zawn a ngai a ni. Manager awmna lam ka pan a, ei tùr an peih hmaa làmna lama làm kan duh thu ka va hrilh. A kiangah ka lêt leh a, min lo nuih sen sen a. Khatih lai, kha hun kha, ka mitthlaah hian a chám reng tawh dáwn a nih hi! Ni e, a nui hmel ka hmuh hnuhnun ber \um a ni si a!
‘Juleen, ka nguai êm mai, min làmpui peih em?’ ka ti a.
‘Tehreng mai,’ tih pahin ka kaih tùrin a bán min rawn pè a.
Làmna lamah chuan ka kai phei a, pindan thim deuh ruai-ah chuan nupa leh nula-tlangvál inngaizáwngte chu an lo ‘waltz’ mêk a, kan zawm ve a. A tìr chuan nuam a ti tih ka hai lo. Làm pah chuan a hmuiah ka fâwp a, chutah ka dàrah a rawn bei zui hnâp a. Chutih lai tak chuan engkim a rawn danglam leh ta! Music dang rawn ri chuan làm tàwp zàn kan hmang mék a ni tih min hai luihtír thei ta si lo a!
A ngawi reng a, min thlah thut a, chelh beh rual lohin a tãl chhuak a, a tlãn chhe ta! Ruby Tuesday chu a chhuahsan ta! Theih tâwp chhuaha ka tih lâwm zawh loh chuan min tlânsan leh ta a nih chu!
Chutianga awmtírtu, an hla ‘play’ chu eng hla nge ni tehrêng ni, tiin amah ngaihsak zui miah loin chair-a \hu chungin ka ngaithla chiang ta a. Engkim a chiang—ka duh chu ka hre ta…
SHE CAN’T LET GO
— Glenn Frey
When I talk to her, I know she doesn’t hear me
She seems to be a million miles away
When the lights start to dim she’ll be thinking of him
She loves him so, she can’t let go
It’s been long enough for her to just forget him
But still she sees his face in every crowd
She walks out of the room when they’re playing that tune
That’s how I know she can’t let go
She can’t let go though she knows it’s really over
She can’t let go though she knows he’s really gone
And I can’t compete with a rose-colored memory
A memory that lingers on and on
I tried everything, but know that just only waiting
For the last dying embers to fade; Oh! she wants to be free
But when she’s holding me…
Thats when I know, She can’t let go!
I love her so; but she can’t let go.