- Lallunghnema, Charity Lodge
Consumer Huanga ka thu leh hla lo chhiar thintute hnen atangin thu lawmawm tak ka lo hre thin a. Chungte chuan min fuih phur nasa thin hle a ni. Mahse, kei ve teh thlawt hi consumer-te chanvo humhalh tura ka vahvaihna khawvelah hian he Consumer Huang avang hian ka buai phah nasa hle thung. Mahse, ka buaina te hi chu ‘chhan tha lam a nih thin avang erawh chuan ka lawm em em zawk a ni. He thu ka ziah lai pawh hian pa pakhat chuan sana a leina a, a lungawi loh thu min hrilh a. Thil tih dan tur ka lo hrilh a ni. Hetiang ang deuh thil hi keini ang duang hian a khat tawkin buaipui tur kan nei ve reng a ni. Thil leia lungawi lo chu bungraw ngaia thleng emaw a thlawn a, a chhe lai siamtir emaw bungraw leina pawisa lak let leh thlengin Consumer Protection Act 2019 hian min tiam vek a ni.
Party Politics khela ka tal ve hrep hnuin ka thian thenkhatte hnung zuiin mipui politics ka khel chho ta zel a. Mipui politics ka tih hi consumer politics a ni ber a, thil dik lo do tur kan nih avangin politics dik tak ka ti thin a ni.
Hetia consumer issue-a ka inhman phat atang hian article ka ziak tan a. Consumer complaint chi hrang hrang remnate leh keimahni ngei ina kan tawnhriatte chu ka pho chhuak zel a. Hah pui viau thin mah ila, hah kan sawi thei lova, lawm takin kan hma a tih tur awm chu hmaih hauh lovin kan ti thin a ni a. Nuam ti taka hahna leh hlim taka hahna a ni ber mai. Article ka ziak tam tulh tulh a, ziak thiam lo ka la in ti zel a, lehkhabu pawh, a bikin consumer interest lam ka han buatsaih hian ka insit tulh tulh a ni. Mahse article ka ziah theih chhung ka ziak ang, ka ti a. Lehkhabu pawh a tangkai dan a zirin ka ziak zel ang ka ti a ni. Consumer zinga harsatna nei te chu ka theih chen chen ka dinpui zel ang, ka ti a ni.
Tichuan, ka Consumer Lehkhabu 6-na tur Consumer 2020 for awareness tih chu Pi Ramdinliani, Supply Director chuan ni 28 February khan min tlangzarh sak a. He lehkhabuah hian message a ziak bawk a ni. A chungah hian ka lawm hle a ni, tih hi ka sawi nghal a ni. Ani kan Pi leh a staff-te hian he ka lehkhabu Consumer 2020 hi min hlutsak hle a, min tiphur hle.An tanpuina leh thawhpuina pawh ka dawng nasa em em a, an chungah pawh ka lawm hle a. Lawmthu ka sawi nghal bawk a ni.
Chhiartute rilrua zawhna awm thei chu Consumer 2020 hi kumkhat aia tamin a liam tawh si a, tih hi a ni a. Ni e, nikum 2021 khan covid avangin hma ka la chak thei lo va; a tlai a tlaiin ka han ti chhuak ta tho a ni. He bu chhunga thu awmte erawh hi chu mimal tan leh chhungkawtin tana tangkai tur a ni a. A thu hi a hlui chuang lova, awareness atan a thain ka hria a ni.
Consumer 2020 buah hian bung hrang hrang ka siam a, Thuchah leh Ziaktu thukhawchang a hma tawnga hmang thupui fun nei chi hrang 42 zet a awm a. A kawm hnung lamah hian kan thianpa Prof. J. V. Nunchunga’n ka chanchin fahrah te te min ziahsak a, a chungah pawh hian ka lawm hle a ni.
Hengte hi ka lehkhabu thupui fun te chu an ni a. Heng zingah hian kawlphetha chhit chungchang leh zir bingna hi tariff hlui a ni a. Ka tum ber chu mipui zirtir a ni. A dang hi chu ka chhui lovang a; chhiartuten zawhna in neih chuan kan inzawt zel ang dawn nia.
Heti hian bul ka tan- Wake up, consumer wake up, Television pawttute u, hei hi lo chhiar teh u, Hei le, consumer movement, Consumer movement retheihna umbo nan, Consumer te thian lehkhabu,World Consumer Rights day, Customer Care zirhona,Ka message dawn thenkhatte, Consumer Jokes, Editor huaisen ka chhar,Consumer Awareness titbits,FCS & CA minister hnena ka lehkhathawn, Consumer te tuboh leh dolung karah, Serchhip Dist. Consumer Assn. an fakawm, Kawlphetha chhit chungchang zir bingna, Carry bag vanga hremna,Mipui mamawh Rawsawt,Thil man sang lutuk sawrkarin a ngawihsan rei lua e, Bus chhungah hripui kan do. Cable TV pawttute tana chanchin lawmawm, Mipui tapchhak thleng phak Ration buhfai, Private School entawn tlak, Eirawngbawlna Gas thuk bawk, Consumer Protection Act-in consumer right min pek 6 te,Huan neitu hlawhtling F. Lalnienga, Bungraw lei thleng chungchang leh thubuai remna thenkhatte,Airline ticket man refund chungchang, Ring takin au rawh, zam suh, Consumer te thlavang hausaktu Consumer Court, Eirawngbawlna Gas home delivery chhunzawm a tul, Thukhawchang chhiartute chibai vek ule, Damdawi zuartu pawisa chawitir thu,Bank pakhat hrem thu leh thunawi dangte,Eng chen nge consumer-ten kan tuar dawn? Mizo officer leh consumer right awareness, USA President lar John F. Kennedy Consumer right champion puitu,Electric Consumer -te tana thu lawmawm, Mizo Officer dikna duhin thiam a chang,Gas Connection pek dan chhui ngai, Buhfai retailer ten signboard tarin Dan an zawm tur a ni, Green zone lockdown ka tawnhriat, Khawvel hri leng rapthlak zual 10 te leh Consumer- te hnena Krismas thuchahte an ni a.Tih sual leh chhut sual a awm nual ang tih ka ringhlel lova. Chu’ngah chuan chhiartute min hriat thiamna ka ngen e. Ka sit hle a, ka chhuang lo, mahse, consumerten an chhawr tangkai ka beisei.