Aizawl khawpui chawmtu tui pump-na khawl a chhiat avangin hun eng emaw chen Aizawl khawpuiah tui a harsa hle a, he harsatna hian ziaawm lam a pan thuai beisei a ni.
Greater Aizawl Water Supply Scheme Phase II-a tui pump chak ber khawl a chhiat avangin hun eng emaw chen Aizawl khawpuiah tui a harsa hle a, veng thenkhatah chuan ni 10 chuang tui a haw tawh lo.
PHE atanga thudawn danin, he tui pump khawl hi kar kalta Zirtawpni khan siam that a ni a, tlai dar 6 khan test pump neih niin, a tluan zel chuan tun kar atang chuan tui sem dan pawh a pangngai tan tura ngaih a ni.
Tui pump khawl a chhiat hlek emaw, power supply lama harsatna a awm emaw avanga tui pump theih loh zeuh hian a nghawng thui thei hle tih thawktute chuan an sawi.
Hun pangngai, khawl a chhiat loh chuan Aizawl khawpui tan ni khatah tui litre maktaduai 25 atanga maktaduai 27 pump chhuah thin a ni a, tui connection neite hnenah chawhrualin ni 10 chhungin vawi khat sem thin a ni a. Thla khat chhungin consumer pakhatah tui lire 7,500-8,500 vel sem chhuak thin anga chhut a ni bawk.