Kashmir khawpui, Srinagar-a Pathiannia mi firfiakten bazar lun taka grenade an tihpuahah mi pakhat a thi a, mi 20 velin hliam an tuar bawk.
“Tlai dar 4:20 velah mi firfiakten grenade hi Hari Singh High Street-a police leh venhim hnathawktute awmna laiah an vawm lut a ni,” tiin police hotu pakhat chuan a sawi.
Mi firfiakte chet hun lai hi kartawpa mi bazar an tam vanglai a ni.
Kum 71 mi, Srinagar chuan hnuai lama mi, Mohammad Aslam Makhdoomi chu a hmunah hian a thi nghal a ni.
Hliam tuarte pawh Shri Maharaja Hari Singh (SMHS) damdawi inah lak nghal an ni a. Thenkhat chu an nain an ngaihtuahawm hle nia sawi a ni.
“Grenade tihpuah hun lai hi mi tam vanglai a niu a. Putar kum 71 mi chu thiin nula pakhat na zual tak a awm bawk,” tiin police officer Rakesh Balwal chuan a sawi.
Hliam tuar zingah hian police pakhat a tel bawk tih a sawi.
Venhim hna thawktute chuan an hotu lawkte nen a hmun hi an thleng nghal a, a hmun hi mi dang tlawhpawh theih loh turin an khar nghal.
A titute hi zawn zui nghal mek an ni a. Eng pawl mahin an tihah an la chhal lo.
Jammu & Kashmir pum hi India leh Pakistan chuan an ram chhung ve ve-ah an chhal a; mahse, ram zim te ve ve chauh an awp.
Srinagar-a thil thleng hi mi tam takin an dem a, a langsar zingah chief minister hlui pahnih pawh an tel.
Mehbooba Mufti chuan, “Rawng taka inbeihna hi ka dem tak zet a. Jammu & Kashmir mipuiten an nunna an hloh va, hetih lai hian India emaw, Pakistan emaw pawhin buaina leh thisen chhuahna titawp turin hma an la lo. Nunna chân chhungte leh an duh tak chânte tan ka tawngtai a ni,” tiin Twitter-ah a tar lang.
Chief minister hlui dang, Omar Abdullah pawhin, “Hetianga inbeihna rapthlak leh nunrawng hi a na thei ang berin ka dem a. Nunna chân hian Jannat-ah hahdamna a neih ngei ka beisei a, hliam tuarte pawh tha taka an dama, rang taka an dam chhuah leh ka duhsak a ni,” tiin a tar lang ve bawk.
Granade tihpuah hi Peoples Conference, J&K Apni Party leh BJP te pawhin an dem thu an sawi hlawm.