Brazlian model lar Suzy Cortez tan Russia President Putin hmachhawn kha mangchhia thlentu leh hlauhna, thlabarna leh inchhirna siamsaktu a ni tlat mai.
World Cup 2018 a thil thleng heti ang hian a sawi: “Ka kut a hmer a, minute rilote min en vang vang a, nuam lo riaua hriat-na leh lai deuh tlat inngaihna ka nei chiang hle. Ka ngaihtuah let leh hian min tihlauthawng,” a ti.
Kum 31 mi hian Putin chu mi kherkhiap, tharum ngainami ni tela a hriat thu pawh tarlangin, “Zanriah kan kil lai khan Putin hian ka kut a hmer deuh vak a, min melh na deuh bawk a ni ang.. hlauthawng angreng takin ka awm hman.
“A \hut dan te lah kha Lal ang mai a ni a, ka hnena sawi duh a neih chuan a secretay a hrilh hmasa phawt zel a, secretary chu lo kalin, a thil sawi te min hrilh chhawng veleh thin,” a ti bawk.
President Putin hian Suzy hi a ngaina hle ni ngei tur a ni, a fak deuh reng bakah a duh hun huna Russia rama zin turin a sâwm.
Suzy-i’n Moscow khawpui a thlen khan taxi-in a duhna hmunah a kal mai thin a. Putin nena an intawn hnu ah erawh sorkar motor changkang leh tha tak hmangin a duhna piangah an hruai thin a ni. “Ka tan chuan thil danglam tak a ni a, ka himna tur a ngaihtuah vang nge ni a, min enthlak zui a duh vang hrim hrim ni ang, tiin ngaihtuahna a kal thui duh hle. Chawlhkar khat vel ka cham hnu ah Brazil-ah ka let leh,” tiin a thil tawn a sawi chhuak.
Ukraine ram hnehchhuh tuma indo a kalpui vut vut tâkah chuan Suzy pawh hian a ngaihdan kha a dik hle tih a hmuchiang a, Russia ram-ah zin leh pawh ni se, a nunna atan a hlauhawm hle tawh ang, tih thlengin a chiang hle.
“Putin hian tharum thawhna hlenchhuak turin theihna a nei a, tunah pawh Ukraine laka indo a puan atang hian a hriat mai a lawm” tiin tawp a khar a ni.