A hun takah player ‘class’ bikte an danglam \hin. Real Madrid striker Karim Benzema chuan khawvela striker \ha ber zing ami a nihna a lantir zanah a team hnehna a chanpui a. French club Paris St-Germain lakah tho lehin Real Madrid in UEFA Champions League quarter-final an lut.
Santiago Bernabeu a inkhelah hian Real in si an phur hmasa a, first leg-ah 1-0 a tlawm tawh an nih bawk avangin an tla dawn niin a lang hman.
Mahse second half-ah Benzema hian goal thum a khung a. 3-1 a hnehna changin 3-2 aggregate in Blancos in Paris khaw club an lehthal.
Benz class
Santiago Bernabeu-ah Real Madrid \antuten an team chu thawm ring nena \awiawm hlawhtlin an tum a. An tum ang erawhin thil a kal lo.
Nipui laia lakluh ngei an tum PSG forward Kylian Mbappe chuan first half-ah goal a khung a. Mauricio Pochettino pawlte an hlawhtling dawn niin a lang.
Mahse second half-ah minute 61-naah PSG goalkeeper Gianluigi Donnarumma a chesual a, hei hi remchangah la in Benzema chuan goal a khung.
Real in nunna thar an nei a, minute 76-naah Luka Modric chuan ball \ha tak Benzema tan siamin an goal hnihna a lut a. PSG mangan vanglai takin Benzema hian an goal thumna a khung lehnghal.
France striker hi kum 34 leh ni 80 a upa niin UCL a hattrick siam thei upa ber a ni bawk.
Sum in engkim a siam theih loh
Kum 2011 a Qatar sumdawng hausa hnuaia an awm hnuah PSG in European football-ah hlawhtlinna neih an tum a, player lakluh nan sum an seng hnem.
An tlarhma a Mbappe, Neymar leh Lionel Messi tlar thei club hian UCL trophy erawh an la lei chhuak thei lova. An tan zan ropui aiin dinhmun \ha a\anga an tawlhthluk sawi tur a tam tawh zawk.
Kum 2017 khan Barcelona 6-1 a an sawp hnuah an tling zo chuang lova. Kum 2019 khan Manchester United team nawi tak hmaah an tlawm bawk.
Tun \umah pawh second half minute 17 chhung tih loh chu kawng engkimah mualneitu team aiin an khel\ha zawk.
Marco Verratti chu muallai luahtu niin engkim khaikhawmtu a ni a. Neymar leh Messi ten hlauhawm an siam fo a. Kum 23 mi Mbappe-a’n a tlanchakna leh hlauhawmna tilangin offside avanga goal pawm loh vawi hnih a nei.
Mahse an ze ngai an la nei a, second half a an talbuai \hinna a la awm. Goal khung ngei ngei an mamawh hnuah Julian Draxler leh Angel di Maria an dah lut a, mahse an talbuai hnuah goal hlauhawm mumal an insiam leh hleithei tawh lo.
Real Madrid chakpuitu Benzema chuan, “An team hi kan hrechiang a, kan zar buai hneh phawt chuan buai lo mahse an inkhelhdan \hin anga khelh an harsat \hin tih kan hria. Ball an chan loh chuan an tlarhma pathumte tih lansarh an harsat \hin. An lakah kan ‘press’ thiam chuan an buai \hin tih kan hria.” tiin an chakna chhan a sawi.
“First leg a 1-0 chauh a kan tlawm kha kan vannei hle a, mahse Madrid-ah chuan engkim a danglam dawn tih kan hre lawk. Kan beidawng lova, inrintawkna kan nei reng a ni.” tiin a sawi belh.