Guwahati Zoo a\anga lak luh, Aizawl Zoological Park-a sakei dah thar chu mipuite en theih turin nimin khan Environment, Forest & Climate Change Minister TJ Lalnuntluanga’n a tlangzarh.
Aizawl Zoological Park-a sakei dah thar chungchang sawiin TJ Lalnuntluanga chuan, India rama sahuan hrang hrangte enkual a nih hnuah Guwahati Zoo chuan sakei lak tur tuak khat an lo neih thu a sawi a. Central Zoo Authority hnenah phalna lak fel a nih hnuah sakei hi a tirah hauhuk nupa nena inthleng tura tih a nih thu sawiin, “Ramsate hi a leia lei theih an ni lo a, sahuan hrang hranga ramsate nen inthleng kual \hin a ni,” a ti.
TJ Lalnuntluanga chuan a tirah Guwahati Zoo-a sakei tuak khat hi Aizawl Zoological Park-a hauhuk nupa nena inthleng tura tih ni mah se, sakei pa zawk a vanduai palh hlauh avangin a nu zawk chauh lak theih a nih tak thu a sawi a. Tuna sakei lak luh thar kawppui tur, sakei pa dang chu tunah hian zoo hrang hrangah an dap mek thu a sawi.
Mipui en theih tura sakei tlangzarhna hun hman a nih hnuah TJ Lalnuntluanga hian thu thar thehdarhtute a kawm a. Guwahati Zoo-in inremna an bawhchhiat hnua sahuan danga sakei dang enkual chungchang zawhna chhangin, “Kan rilruah chuan a aia \ha zawk leh \halai zawk, sahuan dangah enkual chhin ve phawt ila kan tihna ang chauh a ni,” a ti.
Sakei enkawlna senso chungchangah The Zozam Times zawhna chhangin, “Enkawlna senso hi finance a\angin fund a awm a. Chubakah, user charge-te pawh kan la hmang \angkai ang chu. Thil huphurhawmah kan ngai lo,” a ti a. Aizawl Zoological Park luh man chu state dangte aia a la tlawm thu leh an ennawn thuai tur thu a sawi.
Tuna ramsa an enkawl mekte hi chaw khamkhawp an pe ngei nia an hriat thu an sawi bawk.
TJ Lalnuntluanga chuan Aizawl Zoological Park-a sakei dah thar hi kum 2007-a piang a nih thu a sawi a. Tun dinhmunah Aizawl sahuanah hian ramsa chi 21 awm mekin, hei aia tam dah belh tura hmalak mek a nih thu a sawi.
Minister hian Aizawl Zoological Park hi tihlen a, JICA kaltlangin Botanical Garden siam an tum thu sawiin, hmalakna chak taka kalpui mek zel a nih thu a sawi bawk.