ZPM Leader Pu Lalduhoma, MLA chuan ram leh hnam tungding tura hma an lakna ah, Congress party chu an zinga tel ve turin thawhpuiah an sawm tih a sawi.
He thu hi nimina Bairabi Chhimvenga ZPM party zawm thar a lawm luhnaah a sawi a, Pu Duhoma chuan, Congress party chu a hnung zawngin an kal char char tawh a, tunhnaia inthlanna hrang hrangah pathumna an ni char char tih sawiin, an tan chuan tun maiah din chhuah leh a harsat tawh avangin an zinga tel ve turin a sawm nawn tih a sawi.
Pu Duhoma chuan, Pathian leh kan ram tan tih thupuia hmangtute party-ah mizote an chep thu leh contract hna thawh chungchangah pawh Mizote aiin Kamrula Chhangte te chuan hna tam tak an thawk leh si tih sawiin, Health Care Scheme-ah sum tam tak leiba an nei a, damlo ten harsatna an tawk nasa hle tih a sawi a. Mizoramin a hrawn mek sorkarah sual a ngam pat thute, Kuhva tawlhruk leh ruihhlo tawlhruka inhnamhnawihte leh ram hruaitute hian inkungkaihna thuk tak an nei tih chu mi zawng zawng hriat a nih thu a sawi a, MNF soprkarah ram leilung fate aiin hnamdang mi ten duhsakna an dawng hnem zawk fo tih a sawi rualin, ZPM an sawrkar hunah chuan heng zawng zawng hi an ti bo vek dawn tih a sawi.
ZPM thuchhuahin a tarlan danin, Bairabi Chhimvenga mi thar lawmluhna hunah hian neutral – 38, MNF-70, Congress-110 lawmluh an ni a; he hun hi Kolasib Block President Pu R. Lalruaia’n a kaihruai a ni.