Nipui laiin buaina nasa tak an tawk a, star player chhuak, sum avanga tlakchhiat leh khelmual pawn lama buaina hrang hrangin tlakbuak mahse Barcelona an insiam\ha a. Nunna an la nei a, coach thar Xavi Hernandez hnuaiah kawng dik an pan. Pathianni zanah Osasuna lakah goal li khungin La Liga-ah pathumnaah an inhlangkai.
Barcelona hian an khingpuite hi a tir minute 30 chhungin hneh takin an nghaisa a, goal thum an khung hman. Camp Nou a inkhelah hian 4-0 in hnehna an chang.
Ningani zanah Barcelona hi Turkish club Galatasaray in an mualah hian goal khung thei lovin an chelh tawh a. Tun \umah erawh duhthusam a bul \anin minute 14-naah goal an khung a. Midfielder Gavi chu Nacho Vidal-a’n a foul a, penalty chawiin Ferran Torres chuan goal a khung.
Minute sarih hnu lekah Ousmane Dembele thawhrah sengin Torres bawkin goal a khung a, Dembele hian minute 27-naah Pierre-Emerick Aubameyang goal khung tur siamsak lehin second half ah substitute Riqui Puig chuan an goal li na a khung.
Barcelona hi league-ah a zawna vawi li an chakna a ni a, Atletico Madrid leh Real Betis te pelin pathumnaah an inhlangkai.
Goal khungtu Torres chuan, “Kan chak hi a lawmawm a, chunglam kan pan zel. Kan tum ber pawh league table-ah a sang thei ang ber a invawrh a ni a, kan inkhelh apiangin hma kan sawn hret hret.” a ti a.
Coach Xavi chuan, “Tun season-ah kan tan league a beisei theih tawh lohah ka ngai, Real Madrid an fal lutuk tawh a, kan chak vek a ngaih laiin game li vel an tlawm a ngai a, hetiang hi beisei ngam a ni tawh lo.” tiin champion an tan a theih tawh loh tluka a ngaih thu a sawi ve thung.