Kangmei lakah fimkhur thar lehzual a ngai e
Khua a roin, boruak a lum chho leh hle tawh mai a, mitin kangmei chhuak thei laka kan fimkhur chhoh leh a ngai hle mai. Kangmei chhuak thawm hriat tur a awm leh ta zeuh zeuh mai a, kan fimkhur tlan chu a ngai a ni.
Pathianni tuka Rungdil bula huan thlam kanga mi pathumin nunna an chante kha a pawi a, fimkhur sen rual chu ni lo mah se, kan bungraw neih leh kan hmanraw kawl ang angte kan fimkhurpui a, kan electric line kal vel thlenga kan fimkhur zual hi chu a ngai a ni.
Sorkar in kumtin Kangmei ven hapta a hmang thin a, a hapta chhung chiah hian inven ngai a ni tih kan hria ang tih hlauhawm tak a ni. Nitinin nun pui ila, kan thinlungah kangmei chhuak hlauhawmzia hrereng chungin inven pawimawhzia kan hriat a tul a, chutiang tura kan fimkhur reng pawh a tul hle a ni.
Lo neia eizawngte tan pawh thlawh hma lak chhoh hun, lo hal hun a ni chho a, in lam leh ram lama kangmei chhuak thei hrang hrang laka kan fihlim a, kan fimkhur thiam reng hi a tul a, kangmei ven hapta kan hman thar reng hi a tul hle zawk a ni.
Khaw thenkhat chuan mei lam sial hnatlangte an la ko mup mup reng a, kangmei chhuak thei laka inzirtirna lam hawi an la au dum dum thin bawk. Hetiang deuha inzirtirna hi kan neih reng a tul a, khawpui leh thingtlangah kangmei chhuakin a nghawng nat dan a inang reng tih hria nitin kan fimkhur zual a tul hle mai.