Aizawl Municipal Corporation (AMC)-in bawhhlawh paihna senso sharing pattern a hman lai a tidanglam a, Aizawl Mayor Lalrinenga Sailo-in mipuiin bawlhhlawh paih man a letin an chawi tam a tul tawh dawn tih a sawi.
Nimin khan Aizawl Mayor hian Venghnuai tlawhin, local council hruaitute nen an inkawmnaah tun hnaia Board of Councillors thukhawmin bawhhlawh paihna senso sharing pattern an tihdanglam thu a sawi a, “Tuna sharing pattern hman meka AMC-in zaa 80 tuma local council/mipuiin zaa 20 an tum chu AMC tum tur titlemin zaa 60, mipui lam tum tur pungin zaa 40 a ni tawh dawn,” a ti.
Lalrinenga Sailo chuan, bawhhlawh paihna sensoa mipui tum tur an tihpun chhan sawi fiahin, Tuiriala bawlhlawh sawngbawlna hmun, Solid Waste Management Center chu AMC kutah a awm tawh a, hemi enkawlna tur pawisa inhlan tel a nih loh avangin AMC tan senso a hautak dawn tih a sawi a, hemi avang hian mipui lam chakna hman tel a \ul a, tuna an chawi aia a leta tam bawlhhlawh paih man an chawi a ngai dawn ta tih leh sorkar kum thara hman \an tur a nih thu a sawi.
Tuna bawlhlawh paih man mipuiin an chawi mek hi kum 10 kal taa rate siam a nih thu sawiin, thil man a to chho zel nen bawlhlawh paih man tihsan a ni chu mipui pawhin an hrethiam hle nia an hriat thu a sawi a, Aizawl khawpui chhung a thianghlim zel theih nan AMC, local council leh mipui an \anrual a ngai hle tih a sawi.
Mayor chuan Aizawl khawpui chu February 25, 1890 a\anga vawiin thleng hian mei mit lovin kum 132 chuang a lo ding tawh tiin, a din \an ni, February 25 chu Aizawl Day-ah BoC \hukhawmin a pawm thu leh kum thar a\angin Aizawl Day chu hman a ni dawn tih a sawi a, “Festival ropui tak angte pawhin a hman theih a, Aizawl Day hman dan tur ngaihtuahtu turte pawh siam a ni,” a ti.
Mayor hi Venghnuai Local Council hruaitute leh MNF unit hruaituten lo dawngsawngin Biakthansanga inah inkawmhona hun an nei a, he hun hi Venghnuai Local Council Chairman KC Lalrinmawia’n a kaihruai a ni.
Hemi hnu hian Mayor leh khawtlang hruaitute hian Venghnuai huam chhunga tuikhurte siam \hat dan tur an en hoa, hmalak thuai an tum a. Venghnuai Local Council leh MNF unit hruaituten veng hmasawnna tura an mamawh an thlen te chu a tul anga bawhzui a tum thu a sawi bawk a ni.