Aizawl: Covid-19 leng avangin Mizoramah academic session hnih ngawt zirna in hawn a nih loh hnuah academic session tharah dan pangngai (offline)-in zirna kalpui a ni tawh dawn a, April 5, 2022-ah zirna in zawng zawng hawn a ni dawn.
Education Minister Lalchhandama Ralte hovin education department officer leh zirtirtu inzawmkhawm pawl hruaitute chu nimin khan a pisaah thukhawmin school session thara school hawn dan tur chungchang an ngaihtuah a. Thutkhawm kaihruaitu, education minister chuan April 5, 2022-ah Mizorama zirna in zawng zawng hawn a ni dawn tih a sawi.
Lalchhandama Ralte chuan hri leng avanga dan pangngaia zirna in hawn theih a ni lo chu zirlai naupangin an tuar em em tawh tiin, tunah hian India ram hmun hrang hrangah zirna a pangngaia kalpui a lo nih leh takah chuan sorkar rawn chung leh SOP zir chiangin offline-a zirna in kalpui turin zirna in zawng zawng hawn a ni dawn ta tih a sawi.
Minister hoa thukhawm chuan private sikulten fee a pangngaia zaa za an lak chu an phalsak a, sikul luh leh huna kaihhruaina (SOP) chu director, school education lamin an sem darh nghal ang.
Pre school – Balvaatika leh Vidhya Parvesh tih hming chu a ram mila hming phuah rawt a ni a, Mizoram School Standard Authority leh School Quality Assessment Framework pawh ngaihtuah zui a ni a, tihlawhtling tura bawhzui zêl remtih a ni a. Thutkhawmah hian Covid-19 vanga board exam thu tluan thei lote tan ruahmanna siam tum a nih thu pawh rel a ni.