Spanish champion lai in “Atletico Madrid” tak mai a football khelin an khingpui Manchester United chu UEFA Champions League a\angin an paihchhuak a. 1-0 in Old Trafford-ah chakin 2-1 aggregate in an tling.
An khelmualah Ralf Rangnick-a pawlte an thawkrim a, inkhel thununtu zawkah \angin goal pawh an bawh na zawk. Mahse a pawimawh ber goal an khung thei lova, mahni goal ven phawt hnua rang taka nawrlet tum Atletico Madrid in an tum an tihlawhtling a. Halftime hma minute li a la awm a Renan Lodi tauh luh chu hnehna an chanpui.
Atletico Madrid in an coach Diego Simeone duhdan ang takin football an khel a, ball chan tam aiin rim taka thawh a, United football khel tur tihbuai an tum. Hun\ha an neih veleh an player che rang leh ball thiamten danglamna an siam.
Second half-ah an goal an veng uluk hle a. United in chance \ha an neih ve apiangin an goalkeeper Jan Oblak chuan a chhanhim \hin.
United hian first half-ah Anthony Elanga hmangin goal chance \ha tak an nei a, Bruno Fernandes leh Raphael Varane pawhin khung teuh mahse Oblak-a’n a dansak vek a. Red Devils hian a zawna kum nga nan trophy an chawi dawn lova, season tawpah league a a sang pali zinga tel tum bak tinzawn tur an nei tawh lo.
Rojiblancos an tlo
Simeone-a’n football a khelh \hinlaia a inkhelh dan ang hlimthla in a team a din a, he Atletico team hmaah hian Europe club \ha tam tak an lo tlu tawh \hin a. Spanish champion hian kum 2020 khan champion lai Liverpool pawh hetiang hian an lo paihchhuak tawh.
An mualah Red Devils in bul an \an \ha a, first half-ah midfielder Fred leh an tlarhma te an ball khawih a hmuhnawm a, mahse Stefan Savic-a leh a \hiante an khauh.
Atletico in tharum hman an hreh lo chauh a ni lova, a hman hun an hria a. ‘Professional foul’ nei thiam hle in United in ball an inpe kual tur chu an titawp ngun.
Atletico in a hun taka ball tih thih an thiam a, United lam ti \ang ulhin second half tawp lam minute 30 chhuungin minute 11 leh second 19 chiah ball a nung.
Hei vang tak hian United manager Ralf Rangnick chuan inkhel zawhah, “Second half-ah inkhelh a har a, inkhel an titawp zel. Tu emaw ber khelmualah an tlu a nih loh pawhin an foul \hin. Referee thutlukna mak angreng tak tak pawh a tam a, inkhel thlak danglamtu tih khawp a lian ni lo mahse an hun khawhral tum dan zawng zawngte nena thlir a minute li chiah pek belh a ni kha thil nuihzathlak zawk tak niin ka hria.” a ti.