Auto Corner
by Ruata
Kum 2022 Autocar Award sem
Car of the Year, 2022 Mahindra XUV700
Autocar India buatsaih kum 2022 Autocar Award chu sem a ni a, hetah hian Car of the Year-ah Mahindra XUV700 thlan a ni a, Bike of the Year-ah chuan TVS Raider thlan a ni.
Mahindra XUV700 hian tehna hrang hrang atanga chhuta Car of the Year ni ve thei dinhmuna ding Maruti Celerio thar, MG Astor leh ama lirthei huanga a elpui mek Tata Safari te aiin a rawn chungnung zawk a. Mahindra company hian an hmanraw changkang leh tunlai tak tak hman te, an khawl tha tak hman te leh himna hmanrua bakah thil dang dang hmangin he award la tur thlangtu jury te rilru hi an hneh a ni ber a. Mahindra SUV chang-kang leh mawi tak, chak tha bawk si Mahindra XUV700 hian hnehna a chang ta a ni.
Hei mai bakah hian Mahindra XUV700 hian lirthei, a man nena inphu ber lawmman Value for Money Car of the Year leh SUV chang-kang ber Executive SUV of the Year award te a dawng tel bawk a ni.
2022 Bike of the Year atana thlan chu tarlan tawh ang khan TVS Raider a ni a. A design mawi tak, a khawl tha tak, a man nena a inphuna leh thildang tam tak vangin a thlangtu mithiamte rilru a hneh niin a lang a.
Scooter lamah chuan Yamaha Aerox 155 chu Scooter of the Year-ah thlan a ni a, a R15-derived khawl chak tha tak te, a landan mawi leh ‘sporty’ tak te hi a thlangtute rilru hnehtute zinga mi a ni.
Bike man to leh changkang zual ho bik tana award Premium Bike of the Year award chu British bike company lar leh tha tak mai Triumph ho bike, Trident 660 in a dawng thung a. Ram pawn atanga lakluh tha ber Import Bike of the Year chu Ducati Multistrada V4 S in a dawng thung a ni.
Award dang
Citroen atanga SUV thar C5 Aircross chuan Best Design and Styling Award a dawng a. Nikum maia a hmelthar (facelift model) tlangzarh Jeep Compass chu Car Variant of the Year-ah thlan a ni bawk.
Car changkang leh man to ho tana siam bik Luxury Sedan of the Year award chu New Generation Mercedes S-Class ina dawng a. India rama lirthei huang hralh tam ber pawl ni mek compact SUV huangah chuan Renault Kiger chu Compact SUV of the Year-ah thlan a ni bawk a ni. Tun tumah chuan compact ho aia lian hret Midsize SUV of the Year-ah Volkswagen Taigun thlan a ni.
Two wheeler lamah let leh ila. Bike Variant of the Year ah Hero Xpulse 200 4V thlan a ni a, bike chak ho tan bika siam Performance Bike of the Year award chu Suzuki Hayabusa in a la thung a. Viewers’ Choice Bike of the Year-ah Royal Enfield Classic 350 thlan a ni bawk.
Car chak ho tana siam Performance Car of the Year award chu all-electric Porsche Taycan in a la a. Audi e-tron electric SUV chuan boruak chhia pechhuak lo ber leh kan chhehvel boruak atana lirthei him ber Green Car of the Year award a la bawk a ni.
Heng bakah hian Person of the Year-ah TVS Motor Company Chairman Venu Srinivasan thlan a ni a. Lirthei siamtu tha ber Manufacturer of the Year award chu Tata Motors hnenah hlan a ni bawk.