Buhfaia MP thahnemngaihna a fakawm
Zirlai pawl hruaitu a nih lai atanga thawm nei na leh a tih lam kawnga kal na ve tak Rajya Sabha MP K. Vanlalvena chuan FCI atanga Mizoramin buhfai an dawn tipung turin parliament-ah a auchhuak leh a, a thawm ri hrim hrim leh a chetna reng reng hi ngaihthlak a nuam thin khawp mai.
Mizoramin Parliament house pahnih (Rajya Sabha leh Lok Sabha) ah ah seat khat ve ve kan nei a, kan MP te tan thusawina neih ve a harzia leh hun chan a harzia hun hmasa lamah kan hre fo a, MP te pawh ngawi thei kan tithin hle. Tunah erawh tum chuan kawng a awm tih hretute hnenah kan Rajya Sabha MP in thawm a rawn nei ta fo mai a, a lo harsat tawk lohzia min hriattir ta fo mai hi a lawmawm a, a ke pen tin hian mipui thinlung a dek reng tawh ang.
Ram rethei, hausa lova khawsa leh awm kan ni a, engmah intodelhna tak tak nei lo kan ni. Buhfai pawh kan ei nasat a ni a, rorel lai MNF pawh hian an campaign lai atanga an tlangaupui nasat a ni bawk. Hmarchhak state hrang hranga FCI kalphung chu siam danglam a tul tih sawiin K Vanlalvena hian, “Assam, Arunachal, Nagaland leh Manipur ten anmahni state-ah theuh FCI Regional Office an neih laiin, Mizoram, Tripura leh Meghalaya ten NEF hnuaiah office pakhat, Shillonga mi an intawm chu a dik lo a ni,” tiin, state pathumte hian a hrang theuha mahni state-ah FCI office neih a tul thu a sawi a, hlawhtling ngei se a duhawm hle.
Kan intodelh mai thei lo pawh a ni ang, mahse FCI kalphung hi kan MP duh dan ang hian sawi danglam deuh niin, min siksawi sak thei se la chuan thlaphang lovin kan awm zual thei ngeiin a rinawm a ni.