LEHKHA CHHIAR PEIH MIZOTE

  • Rinfela Zadeng

Khawvel changkanna avanga Mobile Phone hmanga Internet kaltlanga Social Media kan ban phâk hnuah hian kan hun tam zawk hi chuti lamah chuan kan hmang ral a, lehkha chhiar kan peih lo a, hun kan neih loh phah kan ti fo a – a dikna chen pawh a awm ang. Chutih rual erawh chuan lehkhabu tha chhiar tur a awm phawt hi chuan Mizote hian lehkha chhiar hi kan la thlahthlam vek lo tih erawh thil chiang tak a ni. Lehkha chhiar ngai lo leh hun nei lo, tui lo leh ngaihven lo hi chu kan awm reng tih pawh thudik a ni.

Chhiar tlak a awm ve a ngai
Mi kan in ang lo a, kan duh zawng a danglam theuh angin lehkhabu kan chhiar duh zawng leh kan ngainat zawng hi a in ang lo a. Chutih rual erawh chuan mi nawlpuiin thil kan duh tlân hi chu a awm vek tih kan hre awm e. Chuti ang chiah chuan thuziak tha leh lehkhabu tha, mi nawlpuiin kan duh tlan leh kan ngaihzawn rawn erawh hi chu vawiin thlengin a la awm reng. Mizo Academy of Letters (MAL) hian kum tin Lehkhabu tha a thlang chhuak thin a, chuti ang ngaihven leh chung lehkhabu chhiar leh chhiar tum hi thalaite zingah pawh mi tam tak kan awm a. Chuvangin chhiar tlak thuziak leh lehkhabu hi a awm phawt chuan Mizote hi lehkha chhiar peih kan nihna hi a lo lang chhuak leh thin. MAL Book of the Year chhiar thei nih te, chutiang lehkhabu neihte chu changkanna dik leh intih changkan dan tur a ni tih hria hi mi tam tak kan awm a, a thlamuanthlak hle.

Thuziak mite tan lak a ngai
Vawiina Mizo te zinga thuziak lama inhmang mekte hi an chhuanawmin an thuziak pawh chhiar tlak tak tak a ni a, an lehkhabu te pawh a tha hlawm hle. Mahse chutah ringawt chuan lungawi loin hmalam pan zel turin tan han la sauh sauh se la, an thiamna leh finna te hi thuziak leh lehkhabu hmangin min hlui zel teh se. Social Meida lar hnuah hian thuziak a pung a, WhatsApp leh Facebook lamah chhiar sen loh khawpin kan nei a, a lawmawm hle. Chutih rualin thuziak thenkhat erawh chu chhiar tlak em em loh te, thuziak dan kalphung fel loh leh Mizo tawng dik fam kim loa thuziak te a awm thin a, hmasawn tura inzir kan ngai hle. Lar duhna emaw hre chiang mang loa thil/thu ziak emaw, kan thu ziah, kan thil sawi mek hrechiang lo leh hre thuk loa thil/thu ziak hmuh tur tam tak a awm thin. Chuvangin thu ziak turte, thil sawi tur leh mi dangte tana thuziak, lehkhabu tha leh tangkai ziak tur chuan a ziaktute lam hian nasa taka tan laka inzir zel hi kan bat a ni.

Kan tih ve tur
Lehkha kan chhiar peih kan tih rual hian lehkhabu/chanchinbu tha chhiar tur chuan sum leh pai sen ve a ngai a, chanchinbu leh lehkhabu man hi to kan ti fo thin. Lehkhabu pangngai tak pakhat chhuah tur hian cheng 70000 aia hniam chuan a theih loh tluk a ni a. Lehkhapuan tha leh a kâwm tha tak, phek 200 aia tam chhuah tur hian cheng nuaikhat dawn sen a ngai a. Chutiang lehkhabu chu a tlawm berah Lehkhabu man hi cheng 200 aiin a tlawm thei lo bawk. Mizo te zinga thuziak mi hausakpui hi mi 10 emaw pawh an awm lo ang a; neih zawng zawng bakah puk chawp leh a ba te’n lehkhabu hi an chhuah thin. Mizorama chanchinbu tha Vanglaini, Aizawl Post, Zozam Times, Lengzem adt la/lei tur hian kan insen ve nual a ngai bawk. Hengte a nih avang hian mipuite pawh hian lehkhabu leh chanchinbu hlutna, a buaipuina tur sum leh pai hautak zia hre rengin sum leh pai ui loa kan insen ve a ngai a ni. Thuziak mite harsatna hriain Mizoram Publication Board leh Mizoram State Library te hian lehkhabu chhuahtute hi sum leh pai tam tak sengin a tanpui thin a, a lawmawm hle. Thuziak tha leh rotling kan neih zel theihna turin mipuite hian lehkhabu leh chanchinbu leina atan hian kan sum leh pai hi ui lo ang u.

Lehkhabu zawrhna dawr
Khawvel changkannain min tuam a, mi tin kan buaiin hun awl pawh kan nei tlem tial tial a, lehkhbu dawra kal hman lo lehkhabu lei duh si pawh mi tam tak kan awm. Heng a nih avang hian Social Media – Instagram lamah te lehkhabu zuar thin kan awm a. FIT Lehkhabu Dawr, The Book Cafe Aizawl, Lekhabuk, Buannel Reads, Amazon adt te hian lehkhabu man bakah pawisa tlem sen belhin kan inah ngei kan lehkhabu min lei tir thei a. Synod Book Room, Baptist Book Room leh Lehkhabu zawrhna dawr kan kal hman lo a nih pawhin awlsam takin kan lehkhabu duh zawng te hi a chunga kan tarlan hian a awm a, Mizo tawng leh Sap tawng lehkhabu tha leh chhuak thar ber ber te hi lei tur a awm reng a, lo hmang tangkai ve ang che.

Lehkha chhiarna hun nei hram hram khawpa mi buai, thawmhnaw thar leh lehkhabu thar hre ve zel thei, Internet Pack leh lehakhbu tha leina tura pawisa nei ve zel thei nih hi tum ila, ram leh hnam tana mi chhawr tlak, Pathian rawngbawltu thawhhlawk leh tangkai kan lo ni ang.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427