Aizawl: ‘Chamdur ramngawa sanctuary-a mi sele kahtir’ tia Minister Lalruatkima puhtu chu nimin khan man a ni.
Social media-ah Tanpuia Zahthang intiin minister chu ‘Chamdur ramngawa sanctuary-a mi sele kahtir’ tia puhin inpuhna chungchangah Nilaini khan Lalremruata Sailo, Dawrpui Vengthar chuan Cyber Crime Police Station-ah FIR a thehluh a. FIR thehluh bawhzuiin nimin khan Laltanpuia Jathang, Melthum-a khawsa chu an man a. Cyber PS Case No. 45/2022 dt.16.3.2022 u/s 500 IPC hnuaiah thubuai hi ziah luh a ni.
Tar lan tawh angin, Lalremruata Sailo hian “Tanpuia Zahthang (Laltanpuia Zahthang) Ph 9862651240 chuan facebook group-a a comment siamah dik lo takin Pu Lalruatkima, Minister (MLA Aizawl West II) chu Chamdur ram ngawa sanctuary-a mi sele a kahtir tiin dawtin a puh a. Min bialtu MLA tihhmingchhiat tuma a puhna hi thudik lo leh dawt ngialngan tak a nih avangin hemi chungchangah hian a rang thei ang bera hma min laksak turin ka rawn ngen a che,” tiin FIR a theh lut a ni.