Villarreal in huntawp dawn lamah goal thum an khung a, an khingpui Juventus lakah hnehna chiang taka changin UEFA Champions League quarterp-final an lut.
Spanish club hian huntawp dawn lamah an khingpuite hi an barakhaih a, 3-0 a chakin 4-1 aggregate in an tling a. Juve erawh a zawna kum thum nan UEFA Champions League round of 16 ah an tla.
Allianz Stadium-ah Yellow Submarines hian goal an khung hma in goal zawnah vawi khatmah ‘shot’ an nei lova. Minute 78-naah Daniele Rugani chuan Francis Coquelin a foul avangin penalty a chawi a, hei hi substitute Gerard Moreno chuan goal-ah a khung.
Juventus tlarhnung chet\hat tawk loh avangin an goal hnihna a lut a. Corner a\anga ball lo kal chu an ven theih loh avangin defender Pau Torres chuan an goal hnihna a khung a. Huntawp hma in Matthijs De Ligt handball avangin Arnaut Danjuma chuan Villarreal goal thumna a khung ve leh.
Inbarakhaihna lian
Spain-ah first leg an khelhin 1-1 in an inhnehtawk a, hei vang hian vawi hnih European champion ni tawh Juve hi tling zawk tura rinkai an ni a. An mualah first half pawh an thunun.
Striker Dusan Vlahovic chuan crossbar tih perin Villarreal goalkeeper Geronimo Rulli chuan vawi hnih a lakah save \ha a siam bawk a. Alvaro Morata goal khung tur pawh a dang.
Unai Emery pawlten hnung takah an tlarhnung remin anmahni lamah goal vengin an tlawm tlat a, mahse goal an nawr ve chhunah an lamah vanneihna a \ang.
Goal lut pathumah Juve tlarhnung in mawh an phur a, a tawp dawna an talbuai chu an tlawm chhan a ni a. Kum 2020-ah Lyon lakah tlawmin nikumah Porto in an paihthla tawh bawk.
Villarreal manager Emery chuan, “Gameplan kan nei a, kan tana a harsat hle lai a awm dawn tih kan hre sa. Gerard kha a hun taka kan dahluh a ngai tih kan hria a, hemi tur hian kan buatsaih nasa. Team \ha tak vek kan hma a ding thei an ni tawh, vawiina kan hmachhawn pawh hi team ropui an ni.” tiin a sawi.
Juventus coach Massimiliano Allegri chuan, “Minute 75 chhung kan khel\ha a, chance an neih chhun an hmang \angkai a, football-ah chuan hetiang hi thleng ve thei a ni.” a ti.