Ukraine-a remna leh muanna atana tawngtaina leh dilsakna karah ram 96 aiawhte lehthalin Miss Poland Karolina Bielawsaka chu Miss World 2021 atan thlan a ni a, March 6, 2022 a neihah Miss India Manasa Varanasi chu top 13-ah langin, 11-nah a awm.
Miss World vawi 70-na hi Puerto Rico khawpui pakhat San Juan-a Coca-Cola Music Hall-ah neih a ni. 1989 kum khan Miss Poland Aneta Kreglicka chu Miss World-ah thlan lo ni tawhin, heti hian vawi hnih an lakna chiah a ni.
Indian thisen kai Miss USA Shree Saini chu first runner up-ah awmin, Cote Di Ivoire aiawhtu Olivia Yave chu pahnihna ah a lang.
‘Stand With Ukraine’
Miss World 2021 thlannaah hian a buatsaihtute chuan candle 7,000 chuangzet an siam a, remna leh muanna atan chhi in, candle pakhat mai pawhina dang-lamna a thlen theih vangin Ukraine tana ‘Prayer for Peace’ tih thuziak chu finalist ho dinna hnungah an tarchhuak.
Miss World Ltd. CEO-in thuchhuah siamin, “Candle pakhat chhit vang maia awmze nei lo tur pawh ni se, eng emaw tak kan tih tho a ngai. Candle hi kan zavaia kan chhit vek chuan khawvel hi kan tidanglam thei a ni. Khawvel hmun tina mite kan sâwm duh a, ‘Ukraine tana an eng chhi chhuak turin kan ngen’ a ni,” tiin social media lamah an tarlang.
Miss World thar bih-chiang ang
Karolina hian Master Degree (Management) a zir mek a, PhD thlenga sualchhuah a tum. Model lar a ni a; tui chen, scuba diving, tennis leh badminton te a tuipui hle bawk. A tum lian ber chu motivational spea-ker a ni a, midangte fuih phur a, midangte tana malsawmna thlentu ni turin a inbuatsaih mek.
Indian nula kha?
Miss India Mansa Varanasi hian thla thum liam taa India aiawha ding Miss Universe 2021 Hamaaz Snadhu hniakhnung a zui teuh hle a, Sandhu hian kum 21 zet crown an hawn tawh loh hnu-ah India mipuite tan lawmna rawn siamin, beiseina thar nasa tak a thlen a ni.
Miss World intihsiakna hi December 16, 2021 khan neih tum ni mah se, contestant mi 22 te’n Covid-19 an kai vangin a hun takah neih theih a ni lo.