Barcelona striker Pierre-Emerick Aubameyang chuan game sarih chhunga a goal sarihna a khung a. Galatasaray lakah hnehna changin Europa League-ah 2-1 in an chak a. 2-1 aggregate a tlangin a sang pariat zingah an tel.
Camp Nou-ah club pahnihte hi first leg-ah goal inpe lovin an inhnehtawk tawh a. Chak ngei mamawhin Barcelona in NEF Stadyumu an lut.
Mualneitu lamin Brazilian defender Marcao hmangin minute 28-naah goal an khung hmasa zawk a. Hei hi halftime hma in Spanish midfielder Pedri chuan goal mawi khungin a sut.
Second half \an tir lamah Aubameyang a che a, a team chakna goal a khung a. Hma an hruai hnuah Barcelona hian ball thununin hun khawhral an tum a. Inkhel entu mipui lungawi lo chuan tui um leh no te khelmual chhungah an vawmlut a, referee in inkhel hi reilote chhung a tihtawp a ngai hial.
Barcelona coach Xavi Hernandez chuan, “Inkhelh hautakna hmunah team \ha tak laka kan tho leh thei kha a fakawm a, kan khel\ha hle. Kan laka inven an thiam a, kan dawhtheih pawh a ngai hman hle. Kan tan hnehna pawimawh a ni a, Europe huap inelna a nih avangin thui tak kal kan duh.” tiin an chak hnuah a sawi.
Premier League club West Ham United pawhin hnehna an chang a, first leg-ah tlawm zawkah \ang mahse extra-time ah an chakna goal Andriy Yarmolenko chuan a khung a. 2-1 aggregate a Sevilla hnehin kum 1981 hnua a vawikhatna atan Europe huap inelnaah quarter-final an khel dawn.
West Ham tan Tomas Soucek chuan goal hmahruai a khung a, kum 32 mi Ukrainian forward hi an ram boruak avangin chawlh pek a nih hnuah inkhel lehin chakna goal a khung a. Hammers fans-ten inkhel zawhah lawmin an bawr hneh hle.