Congress party thalaiin, Assembly budget session neih zawh takah March ni 9, 2022 khan Opposition group leader Lalduhoma’n thudiklo a sawi nia sawiin, ngaihdam dil turin an phut.
Assembly budget session-a Lalduhoma thusawi chu chhangin Congress party thalai chuan Congress party-in “MNF MIP sing nga hi kan lan loh chuan,” tiin an sawi ngai lo niin an sawi a, NLUP hming thar atan pawh NEDP vuah a nih loh thu leh NEDP chu NLUP kal zel atanga lo piang, kum 2016 atanga kalpui chauh a nih thu an sawi.
Lalduhoma chu Synod social front-in NLUP an zirchianna, a kum leh a hun chhung dik taka sawilang duh si lova mipui bumna atana hmangah Congress thalai chuan an puh a. Lalduhoma’n “Synod-in a zirchiannah ‘hemi kum’ chhung hian chhungkaw 7 chauhvin cheng nuai khat an dawng,” tia a sawi chu “‘Hemi kum’ a tih hi eng kum leh eng hun chhung nge tih kan zawtlêt a ni” an ti.
Congress thalai chuan “Synod social front-in khaw 10-NLUP dawngtu chhungkaw 300 te April-July, 2012 chhunga a zirchiannaah – NLUP dawngtu 10.3% chu eng political party maha inziahluhna nei lo an ni a, NLUP sem chungchangah party induhsak bikna awm lo nia hria 73.6% an ni a. Trade thlan chungchangah 70.6% ten mahni duhzawng trade an thlan laiin 29.3% te chu sorkar/mawhphurtu ten an thlansak an ni” an ti a. NLUP-in Mizoram pum a dap hneh hle nia sawiin, Mizoramah kum 2011 chhiarpuiah chhungkua 2,21,077 awmin, kum 2017 April thlengin chhungkaw 1,30,229 lai NLUP-in a tuam hman niin an sawi.
Congress thalai chuan “Congress sorkar lai khan Prime Minister chairman nihna Cabinet committee on economic affairs (CCEA)-in NLUP atan Rs. vaibelchhe 2873.13 min pe a, Congress sorkarin state leiba tipung lovin hneh takin NLUP kha a kalpui” an ti a. “Budget atanga leiba nei mang lo chungin sum renchem takin NLUP sem a ni a, sorkar hnathawk hlawh leh GP fund pawh pek reng a ni” an ti.
Budget session-a NLUP te, SEDP te sawiseltu Lalduhoma chuan kum 2010-a ZNP hotu ber a nih laia AMC inthlan campaign a khuhhawnnah NLUP chu nasa taka fakin, Congress an thawhpui chak chhan ber a nih thu a sawi niin Congress thalai chuan an sawi a. Hei hian Lalduhoma’n mize nghet a neih loh zia a pholang chiang niin an sawi.
Congress thalai chuan “Mizorama kan kalphung (system) siamthatna atana nasa taka ngaihtuahna sengtu MPCC president Pu Lalsawta lehkhabu ziak ‘That Loh Theih Lohna Bawm,’ chu Pu Lalduhoma bawk hian a engamahhmain a sawisel leh ta chiam mai hi a mak hle” an ti a. Lalduhoma chu khawi bawmahmah awm thei lova tlanchhuak zel, mi nghet lo leh thudik lova midang sawisel lama ‘talent’ nei thaah an puh bawk.