Russia chuan missile hmangin Ukraine khawthlang lama Lviv khawpui bul lawka awm, thlawhna siam \hatna hmun (aircraft repair plant) chu a kap a. He khawpui hi indona tlanchhiatsan mi tam tak tlan luhna a ni.
Khawpui laili a\anga km 6 vel chauhva hla hi rikrum thila che chhuak chi lirthei eng emaw zatin a hmun hi an pan nghal a. Zirtawpni tukah khan thil puak ring tak tak vawi thum hriat a ni.
Tumah inhliam erawh an awm hriat a ni lo.
Lviv hi puih ngaite puina pek luhna kawngkapui ber a ni a, indona tlanchhiatsan mi sang tel luhna a ni bawk.
Ukraine khawthlang lam hi an ram hmun dangte aia indona thlen tlemna a ni a. Russia hian kil thum – hmar, khawchhak leh chhim a\angin a rûn a, Lviv leh a bul hnai khaw dangte chu an la him angreng hle a ni.
Tun dinhmunah erawh thil a danglam leh ta a, Zirtawpni tuka missile-a kah a nih bakah hian Pathianni khan missile hmang vekin khawpui daia sipai training-na hmun pawh kah a lo ni tawh.
“Tuk tin air raid alarm a ri ziah a, vawiinah erawh beihna tak tak chu a lo thleng ta,” tiin kum 82 mi, Valentin Vovchenko chuan Lviv a\ang hian AFP news agency a hrilh a. “Kyiv-ah beih kan tawh avangin kan tlan lut a, hetah pawh min rawn bei leh \an ta,” a ti.
Mayor Andriy Sadovy pawhin military aircraft maintenance facility hi cruise missile hmanga kah ngei a nih thu a sawi.
A hmun hi tun dinhmunah hman a ni lo va, Danylo Halytskyi International Airport a\anga hla lo tak a ni a. Sadovy-a chuan thlawhna \umhmun hi chu a him rih niin a sawi.
Ukraine air force chuan Black Sea a\angin cruise missile paruk hmanga kah a ni a, pahnih chu anti-aircraft missile hmanga an lo kah thlak hman thu a sawi.
“Russian-te hian Ukrainian thlawhnate vansanga an chet theih lohna turin an hmunte an tum a ni,” tiin Royal United Services Institute (RUSI) think tank-a director \hin, Prof Michael Clarke chuan BBC a hrilh.
Lviv hi Poland a\ang pawhin km 80 chauhva hla a ni a. Poland-ah hian Ukrainian maktaduai hnih chuangin himna zawngin an tlan lut tawh a, an chenna in a chhe nasa tawh hle a ni.
Prof Clarke chuan hetianga Russia-in ramri bul lawk a kap hi khawthlang ramte tih\haiha Ukrainian puitute tihhlauhthawn nana a tih a ni thei tih a sawi.
UK Armed Forces Minister James Heappey chuan Ukrainian-te hi Starstreak anti-aircraft missile system hman dan an zirtir mek a, he hmanrua hian an ramah an thlen thuai dawn tih a sawi bawk.
Zirtawpni khan Russia hian Ukraine khawpui lian hrang hrang a kah chhunzawm leh.
Khawchhak lama Kharkiv khawpuiah chuan laipuia university building leh mihring chenna in pahnih a kahah mi pakhat thiin mi dang 11-in hliam an tuar bawk.
Chhim lama Kramatorsk khawpuiah missile-a kah vangin mi pahnih an thi a, parukin hliam an tuar a. Khawpui ber, Kyiv-ah mihring chenna laia missile tla a puah tlaikhawhnua avangin mi pakhat a thi bawk.