AC Milan in Serie A-ah point thum a hma an hruaina chu an chhawm nung zel a. Cagliari lakah 1-0 in hnehna an chang a, an dinhmun \ha an la hum.
Inrinni zan Serie A inkhelah Unipol Domus-ah Milan tan Ismael Bennacer chuan goal mawi a khung a. Mikhual team hian goal khung turin minute 59 an nghah a ngai.
Algeria international Bennacer hian Olivier Giroud-a ball kian chu penalty area hmawr a\angin a hlap lut.
Inkhel tawp lamah Milan in goal an chhuah teuh a, Leonardo Pavoletti chuan huntawp dawnah crossbar a tauh per.
Milan coach Stefano Pioli chuan, “Kan inkhel apiang hi fiahna pawimawh lutuk a ni vek tawh. Kan khel\ha ka ti a, first half-ah khan goal khung lo mah ila \ha tak taka ball kan inpek avangin kan khel\ha.”
“Cagliari khan harsatna min siam ve tho a, mahse chak tum team pahnih inkhelah a mak lo.” tiin an inkhel a thlirlet a.
Hmahruaitu ni mek mahse champion lam an la ngaihtuah loh thu a sawi a. “Kan che \ha a, mahse Scudetto la thei mi pali an la awm a, thui lutuk lo thlirin awmzia a nei lo. Tunah chuan kan hma a awm zel chauh kan thlir a \ul.” tiin a sawi bawk.
Inrinni inkhel dangah Serie A champion Inter Milan in point an hloh nawn a. Fiorentina mikhualin 1-1 in an inhnehtawk.
La Viola tan Lucas Torreira chuan goal a khung hmasa a, hei hi minute 55-naah Denzel Dumfries chuan a sut.
Napoli tan striker Victor Osimhen bawk an chhandamtu a ni a. Udinese mikhualin goal hnih a khung avangin 2-1 in hnehna an chang a. Nigerian striker hian tun season-ah goal 15 a khung tawh.