Nupa nun hlimna rahbi pawimawh – 5

  • Robert Zoliana

Sum leh pai sen vakna tur awm lo, tlo leh tha bawk si chu chhawpchhuah a ni.

Eirawngbawl dun
Mipa zei lo leh inti ‘pa’ (pa tak tak si lo) te hian a tlangpuiin Choka- hi hmei-chhiate tan bika siam emaw an ti thin a, eirawngbawl leh thleng sil, hmun phiah, tihfai te thlengin hmeichhe kutah an dah chawt thin.
Chutih laiin, mipa tunlai leh zei tak takte chuan thleng an sil ve bawrh bawrh a, Bai te an siam a, thawh hreh leh tih hreh an nei lo. Heng mipate hi nupuite’n an hahdam pui a, an duh hlum lo chauh thin. Chu chuan, nupa nun a khai ding a, chhungkua a din chhuah pui thin a lo ni.
Nitin a harsa a nih paw’n kartawp (weekend) ah te hi chuan in pahnihin chokaah a tul tul thawk ula, in siam tui emaw tui lo emaw a pawi-mawh ber lova, a pawimawh ber chu inthawh dunna leh hun hman dunna kha a ni.

Love letters inthawn
‘Nupa nih hnu-ah lehzel a ngai emaw ni le?’ i ti mai thei. Min han ring phawt mai teh. Hna a thawk chak fu lehnghal. In khatah in cheng dun a ni thei a, khaw khatah in awm dun pawh a ni thei. Chutih laiin, rilru chhungril ber atanga lo far chhuak te hi thumala rem a han nih hian thinlung hi a ti tui ral zawih zawih thin.
I kawppui chungchanga i rilru put dan te, i hmangaih zia te, a nun-a mawi i tih leh tha i tih te, engvanga nupa kawp-chawi duhawm tak nge in nih tih te bakah engvanga thlir reng thin nge i nih tihte han ziak la, envelope mawi taka i khung hnu-ah rimrui hnawih la, chuks hnap bawk ang che.
Chutah, a hnathawhna hmun thleng turin Dak kal-tlangin thawn la, a nih loh paw’n tuna inchenna address bawk kha ziak la, thil mak tak mai chu a lo intan dawn ta tihna a ni!

‘Hot’ taka inbiak
‘I lo haw hun-ah chumi khami lo hawn rawh, rawn bazar haw nghal rawh’ tia In lam atanga pasal te phone-a biak lam kha a ni lo tlat. Office-ah a thawk emaw khawi-ah emaw tul bik thil vanga a thangboin phone la, In-a a lo haw hun-a engtia hmuh nge i châk thute pawh a leng vek. Chawhmeh tui tak, a duhzawng siam sak a ni tihte kha han hrilh la, ‘I ngaihawm vawng vawng khawp mai’ te han ti chho vel la, hei hian nupa nun a tihthar sawt bakah In-a haw thuai thuai a, hmuh hlan a nghahhlelh tir sawt ang.

Barakhaih!
Beisei loh leh rin loh puia ‘barakhaihna duhawm’ hian mihringte hi min tiharh sawng sawng thei a, hringnun hi par ang a lo vul leh chuk thin. A mit meng bial kawk kawk thei tur ang chi-a barakhaih kha a ni tun tuma kan sawi tura hi.
Hun bik leh ni bik pawh ni chuang lova, pangpar leh chocolate inthawn te, zan lam boruak chhem-alh tura incheina sexy taka inlan te hi mipa te hian an buaipui zui viau a nia, hrereng ang che.

Sexy deuha infiam
I la hria em? In pahniha hlim taka game inkhelh hnu-hnun ber kha? A chak lo loin a chak zawk ‘kiss’ tih te, aaa… a tam mai. Ngaihtuah dun ula, fanau te nena infiam ringawt tum lovin, i pasal nena intihhlimna tur hun thawl neih tum thin ang che.
Khai le, engnge i la nghah fo le? Engemaw ber pawh hi tunah khan han hmang ta la, thil mak leh danglam tak lo thleng tur chu thlir rawh le!

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427