- Lallunghnema, Charity Lodge
Kan tei mai mai chhungin March thla chanve chu kan lo thleng leh ta der mai! Tichuan, nipui a thaw tan, khua pawh a lum tan. Sik leh sa a inthlak a nih hi!
Amaherawh chu, hetianga sik leh sa an inthlak danglam avang mai hian Consumer rinawm erawh chu a danglam ve ngai tur a ni lova, seller rinawm pawh a intidanglam tur a ni chuang hek lo. Anni, heng consumer rinawmte leh thil zuartute, dawrkai leh sumdawngte, thil chi hrang hrang hralhtu rinawm te hi chuan, “Nipui a thaw a nih hi?” an ti satliah ve mai thin. Hengho hi chu an hnaah an chiang hle a. Khawvawtin a tibuai lova, khaw lumin an hna a thulhtir ngai hek lo. An rinawm ngaiin an rinawm reng a, an taimak ngaiin an la taima zel tho a nih hi!
Tun tum Consumer Huangah hian mitina kan mamawh RINAWMNA tih thupuia hmangin kan inkawm khawm dawn a ni a. Consumer-te,Sumdawngte, Dawrkaite leh thil zuar chitin tan kan thlur bing dawn a ni.
Rinawmna hi tute pawhin kan mamawh tih hi a chiang reng mai. Rinawmna tel lo chuan engah mah a hlawhtlin theih lohva. Vanneihna leh hmuingilna pawh hi rinawmna rah a ni. Hlawhtlinna leh malsawmnate pawh hi rinawmna atanga kan dawn a ni. Mihrring taksa leh rilru hriselna pawh hi rinawmna atanga neih theih chauh a ni. Mi, a rinawm loh chuan a hlawhtling thei lova. Mi, a rinawm loh chuan a nun a buai tual tual thin.
Rawsawt buhfai Retailer-in mi rinawm tak nih a duh chuan a hun takah buhfai sem thin rawh se. Buk tling tak ngeiin a buhfai hralh tur chu buk thin rawh se. A buhfai dawr atangin black-in buhfai hralh ching lo se, chu chu rinawmna darthlalang a ni.
Liquified Petroleum Gas (LPG) pawh hi rinawm taka pek chhuah thin tur a ni. Gas Distributor-te chuan Gas Connection hi Hotplate tel lovin an pe chhuak thin tur a ni a. Consumer-te kawtkai ngeiah Gas bur chu chu an pe thin tur a ni. Hei hi Danin a phut tlat a ni. Dan zawm famkim hi rinawmna a ni. L P Gas chu a him dam tur a ni a, a leak tur a ni hek lo. Gas bur chu pek chhuah hma ngeiin buk thin tur a ni. LPGas Card-ah ziah luh thin tur a ni. Gas Card hi blue book an ti thin bawk. Card kawm hi rawng pawl (blue colour) a nih vang ni fa hmiang! Gas Card chhungah hian CONSUMER-TE hriat tur thil tam tak tarlan a ni a. Lo chhiar teh. Saptawng a ziak a ni a, Sap tawng i thiam loh chuan i thenawmte zawt hreh suh aw! Chutiang tak mai a Gas Mannual zawm thin Gas Distributor chu Agent rinawm an ti a, mite tan malsawmna an ni thin. Mahse, tunah hian Gas Agent rinawm eng zat nge awm? Kei chuan ka hre meuh lo! Kawlphetha bill dik se, tui bill dik se, cable TV fiah se, dik takin service se, kan duh a ni.
Bazarah thil lei turin i kal a, dawr nghaktute, dawr aktute leh photue chu an lo insehmur tuau tuauva, an lo inchap zui mai a. Thil zuar rinawm lo leh rinawm em emte chu an lo inkar thelh sung a. Printed price aia sanga thil zuar leh hralh mek deuh vek an ni a. Maximum Retailed Price thai chhiat ching, Biak In chhung chauhva PAWL THARNA CHANG , ‘intikris,’ em emho chuan thuro anga zaidam leh nun nemin anmahni dawr tumtute chu an lo ngaihsak ta thin a. Mahse, kar lovah heng sum rui, bumna thangah hian i awk nghal ngei ang.
Hengho hi Dawrkai leh Sumdawng rinawmna nei ngai lote an ni. Rinawm lo na fam chu Dawrkai leh Sumdawng hlawhtling tak an ni thei ngai lo. Rei lote chhung chauh a hlawhtling an ni a, rei an awh ngai lo a nih hi! Dawrkai rinawm lo chuan bungraw man a duh hun hunah a tisang thin. Ei tlak loh leh hman tlak loh zawrh leh hralh an inthlahrung ngai hek lo. Hengho hian Isua chu a langa mawi tawk chauhvin an Lal atan an pawm a, an rinawm a. Dawrkai chapo rinawm tak ka hre ngai lo.
Dawrkai hawihhawmna nei ngai lo, rinawm i hmu thin em? I hria em? Mahni hmasialnaa khat lei mihring zingah hian tunge chapona dah tha a, intihniam thei ang le. Dawrkai leh Sumdawngho chu rinawm se,dik se, chu chu hlawhtlinna bul a ni. Midangte tana malsawmna nih theihna hnar a ni ngei chhap e.
Consumer-te hlei hlei hian rinawmna hi kan va mamawh teh reng em! Pawisa baa thil leitute hi consumer an ni ve tho a. Chuvangin a ba a thil leitu chuan rinawm takin a ba tur a ni a. A ba chu a hun takah a rul kim vek tur a ni.
Chutianga ti lova, leiba ngaihsak lo, rulh tum lo ho chu Consumer rinawm lo tak an ni a. Tanpui tlak pawh an ni thin lo. Chutiang mi chuan nasa takin Sumdawng leh Dawrkai rinawmte an tibuai thin a. Hengho hian a bain thil an lei a, a bain an bazar a Sumdawng leh Dawrkaite an bum thin. Hetiang mi bumhmangho lakah hian fimkhur hle tur a ni.
Consumer rinawm lo chuan hawihhawmna pawh a nei tlem nge nge thin a ni. Consumer rinawm lo chuan thil man tlawm ringawt a ngaihtuah a, Cash memo leh reciept a ngai pawimawh lova, a thil lei tur a bih chiang ngai hek lo. A dawizep em em a, dawrkaite a hlau ringawt a, a thatchhe thin bawk. A duham hle lawi si thin.
Tichuan, a pawimawh ber chu Consumer rinawm leh Dawrkai leh Sumdawng rinawm hian he Zoram hi a siam nuam thei a ni, tih hi thahnem ngai takin ka sawi a ni. Dawrkaiho kan tih hian hmun hrang hranga thlai, thei, tuibur, pankhawr, sahdah, uisa zuartute, ar leh vawk, bawng leh kel, sangha leh chengkawlte hi a huam vek.
Ka rawn sawi thin tawh angin heng thlawhtheihna passenger-te (air ticket latute) cable TV-te, rail ticket holderte, ukil ruaitute, lu mehtirtute leh a tam lutuk! Sawi vek sen pawh a ni love. Consumer an ni a, an service petu chu Service Provider tih an ni thung.
Rinawmna hi seller leh buyerte hian neih tum theuh ila, Service Provider-te pawh rinawm se, Consumer zawng zawng rinawm ila, Mizoram hi ram nuam a ni mai dawn a ni.