Afghanistan-a finance minister a nih laia US $ tluklehdingawn ruk vel zet budget pawh lo pharh ve tawh, Khalid Payenda-a chu an ram dinhmun a inthlak dawrh hnuah tunah chuan United States-a Washington DC-ah Uber khalhin a chhungkua a chawm mek.
The Washington Post chanchinbu hnenah ni khata darkar ruk a thawhin $ 150 chuang a hlawh ve hman \hin thu a sawi a, thil dang erawh a sawi tam duh vak lo.
Afghanistan hian sum lama tlakchhiatna nasa tak leh mihring talbuaina nasa tak an tawng mek a. US puihnaa din mipui sorkar paih thlatu, Taliban sorkar chu ram tam takin an pawm duh lo.
Payenda-a pawh hi Prime Minister Ashraf Ghani-a nena inkungkaihna \ha tak nei a nih avangin Taliban-in an ram an thunun hma lawk khan finance minister a\angin a bâng a. August 10 khan Twitter-ah, “Vawiin hian minister of finance ka nihna chu ka kalsan a. Finance ministry ka kaihruai thei hi ka nuna ka hun tawn ropui ber a ni,” tiin a tar lang.
Taliban-in sorkar an paih thlak hnuah an man mai hlauvin a chhungte zuiin US-ah hian a kal ve ta a ni.
The Washington Post-in an kawmnaah chuan inthlak danglam thut chu a harsa ve deuh tih a sawi a; mahse, a chhungte enkawlna tur a hmu thei chu a lawm thu a sawi.
An ramin tun dinhmun a tawn chhanah US a dem thu a sawi a, Taliban an len leh theih nan a sipai a hnuk kir hma niin a sawi a. Kum tam tak chhunga rim taka an thawh leh an lo din zawng zawng chu hun reilo te chhungin a chhe nghal vek niin a sawi.