China Eastern thlawhna, tun kar tir lama China chhim lam tlang ram ngawa tla black box chu hmuh a ni ta tih sorkarin a puang.
Chinese aviation thuneitute chuan ni hnih an zawn hnua hmuh a nih tak thu hi Nilainia thuthar lakhawmtute an kawmnaah a sawi.
Thuneitute hian thi zat engmah an la puang lo zel a; mahse, mi 132 phurtu thlawhna tlak dan chhutin dam chhuak an awm a beiseiawm lo hle.
Chhuitute chuan engvangin nge vansanga a thlawh laia lei lama bir thla ta thut nge a nih an la hre thei lo.
Civil aviation accident investigation department-a an director, Mao Yanfeng chuan an chetsual lai hian thlawhna kalkawngah hian ‘khaw awm dan fel lo leh hlauhawm’ engmah a awm lo niin a sawi.
Thlawhna a thlawh hniam thut hma zawng kha chuan crew leh air traffic control pawh pangngai takin an la inbe vek niin a sawi bawk.
Thuthar lakhawmtute kawmnaah hian China Eastern Airlines Chairman Sun Shiying chuan an thlawhna tla ta hi a rintlak tawk a, thlawk thei tura mamawh zawng zawng a nei vek tih a sawi tih Xinhua chuan a tar lang.
Tun \uma thlawhna chesual hi kum 30 chhunga China-a thlawhna chetsualna lian ber a ni a, ram pumah pawi tihna leh sunna thu a ri.
President Xi Jinping chuan a \ul ang zawng zawng (full-scale)-a chhui turin a ti a, sorkar chuan chhanchhuah hna thawk tur za rual a tir a, sipai, mi thiam bik leh thawktu dangten Guangxi province-a hmun kilkhawr tak hi an thleng.
Nilaini vek khan passenger 127 leh thawktu pakua chhungte chuan chetsualna thlenna hmun hi thleng khawmin a bul khaw tereuh te-ah an awm khawm.
Wuzhou-a ram hnuaiah hianmi za chuangin chhanchhuah hna hi an thawk a, black box recorder zawn pah hian thlawhna keh them leh bungraw darhte an la khawm.
Thuneitute chuan dam hmuh an la awm lo tih sawiin chhanchhuah hna thawktute pawhin ruang hmuh an la nei lo.
Hetih lai hian mi mal thil neih neuh erawh chhar an nei nual tawh a. Heng zingah hmeichhe pawisa ip te, mipa ip te leh identity card te pawh an hmu.