CT Scan khawl ngaihsak ran a ngai tawh hle
Hun rei fe chhung chu Aizawl Civil Hospital-a CT Scan khawl a hman theih tawh loh a, damlo mangang leh hmun hla zawk atanga pantute an mangang tawh hle. Khawsak harsa zawkte pawhin man man zawka an pan theih hnaivai a nih thin avangin siamthat thuai a tan a tha hle mai a, sorkar hian ngaihsakin, a siamthat dan tur hi ngaihtuah rang thei se a duhawm hle.
Khawl rinpui ber a chhiat miau avangin mimal khawl loh theih lohin pan a ngai a, khawsak harsa zawkte an khawngaihthlak tawh hle. Damlo tam tak leh mamawhtute chuan hetia khawl chhiaa a awm reng mai hi phurrit a nih phah thu an sawi a, a that hun nghak ta ngat ngat mai pawh an awm hial!
ZPM Legislature Party Secretary Dr Vanlalthlana’n Aizawl Civil Hospital-a CT Scan khawl thla ruk dawn hman theih tawh loh chu pawi an tih thu sawiin, “Sorkar kalphungah chawplehchilha thil tih rum rum theih a ni lo tih hre mah ila, mipui mamawhna a nasat em avangin a rang lama hman theih turin sorkarin hma la se kan duh,” a ti a, a hmunah ngeiin kalchilhin khawl awm dan an enfiah thu hriat a ni bawk.
Opposition party lam pawh hian na zawka sorkar nawr nan an hmang lovang tih a sawi theih tawh loh a, khawl chhe reng hi a rang lama siam a nih ngei theih nan thuneitute leh sorkar hian ngaihtuah hmasakah nei ngei bawk teh se.