Khua a lo thal leh ta

  • Mahmuaka Chhakchhuak

Kum hmasaa thalah khan Aizawl khawpui leh Lunglei khawpui chuan tui in tur kan nei lo tep chu a nih kha maw le. Hei tunah ngei pawh Lunglei khawpuiah chuan tui intur kan nei tlem tanin zan khaw tairek tak tak thlenga tuikhur tuikang nghakte pawh kan awm leh tawh a. Kan naktuk hun tur hi nghahhlelhawm loh tak niin a hriat a, hri leng lahin reh tak tak ni ala neih chiah bawk si loh avangin nitin khawsakna lamah chuan ziaawm tawh tho mah ila hri kai thar nitin kan la awm reng tho avangin invenna lamah inthlahdah theih ala ni chuang si loin mahni inchhung khur mamawh dap alo ngai reng bawk nen khawlum boruak hi ala rei lo viau nain a hautak tan hmel hle mai.
Thlasik kan hmang zo a, Nipui lo la thleng mai tur atana inbuatsaihna ang hrimin Thal kan han thleng hmasa te te a, zoram hmun hrang hrangah chuan hetih hunlai hi Lovah hal hunlai a ni. Khua aro a, tuihna a tlem mai bakah mihringte ngei pawh kan ngurchuaiin harhvang lo deuh bawkin a hriat a. Chutiang zelin chhungkua lam pawhin thawmhnaw lum khungboin thawmhnaw pan leh zangkhai lam kan dahchhuak tan mek bawk avangin zan mut puan sin atan pawh puan pan lam sin chu nuam kan ti tan bawk a, thatchhe deuhte tan chuan zing thawh pawh a har tan ta hle mai bawk a, naupang zing thote ngei pawh tah mai chak taka an awm hun lai tak a ni awm e. Nimahsela chutih lai chuan thenkhatte tan erawh zing thawh a nuamin zing boruak thinghlim tak mai han hip vang vang chu taksa pawhin alo thatpui ngei ang tih ring chungin lirthei khu leng a awm hmain khawlaiah hmuh tur an awm a. Khawpui hmun thenkhatahte chuan zingkara Vai nilum ai lai pawh hmuh tur an tam hle thin bawk a, rang tak taka an tawng hlawm avangte chuan an inhau ta emaw tih mai turte pawh an ni hial thin.
Hetih hunlai hian hmuntinah tuihna a tlem avangin khawpui tam takahte chuan tuisem dan hunbi pangngai pawh awm hleithei loin kar hnih danah vawi khat emaw chauhte tui kan dawng thin a, chu lah duhkhawp a ni chuang loin thenkhatte tan chuan tuikhur lama chawi a ngai tho a, zan rei tak tak thlenga tuikang nghah hial alo ngai ta. Tui chawi motorte pawh chu an tlan leh vut vut tawhin khaw thal hi lawm zawk ang maiin an Driver-te chuan hlim tak maiin hmun tinah tui an phur a. An eizawnna a nih tlat avangin chutia tui mamawhna alo sang ta pawh chu lo lawm zawk ta pawh ni sela a dik lohna engmah a awm chuang kher awm lo e. Amaherawhchu chutia ngaih ngawt chu a dik kher chuang lo ang a, heti tak maia tui connection nei chunga mamawh khawp tui kan nei lo hi chu a dik hauh lo ang. Chutih rual erawh chuan chu harsatna chu keimahni insiam bawk a niin kan tuihnate hi humhalh tha ila chuan heti takin harsatna kan tawk lo tur a ni a, keimahni leh keimahni kan intihrehawm mai mai a ni si a, a pawi ngawt thin mai.
Hmun thenkhatahte chuan Lo halna khu hmuh tur a tam em em a, hetih hunlai hian ngaihtuah loh theih lohin an vah chin bak a kang ang ngem, an Lo vah hal chu a kang tha ang ngem tih leh ram ngaw tha kangchhia a awm ang ngem tih zawhnate chu a chhanna hre mai thei lo mah ila mahni inzawh loh theih loh a ni a. He kan ram zimteah hian ramngaw tha kan neih tlem tawh zia leh thlawhhma neihna hmun atana ram tha pawh a awm tawh loh ziate ngaihtuah chuan a ti chereu zawnga vah loh mai zawk hi tih theih hram nisela a that tehlul nen kan vat lo thei lo bawk si a. Kan ei hmuhna atan hian ram ngaw tha lai vah chhiat hi ala ngai tlat si hi a pawi a ni ber mai. Hetia ram ngaw tha lai kan vah fo avang hian kan tuihna lamin alo tuar zel bawk te hi a pawi a, chung zawng zawng chu mitinin kan tuar tlang ta vek si a, engtin tak hian tuar zel ang i maw le?
Ngawi teh, mihring chauhin kan tuar a ni lo a, ramsa leh nungcha chitin rengte pawhin an tuar a, kum sawm hnih vel lek kaltaa khaw kar kawnga zing tak taka kawngpui kam maia nungcha riak kan thawn thawh thin leh Ramar leh Vahrit tla lai kan hmuh thinte ngei pawh chu hmuh tur an awm tawh lo a, an awm lo a ni satliah lo, an awm hlawl lo a ni. Khawilai kawngpui pawh hi a reh hian a reh ngawih ngawih a, khawilai hmun emawa sava hram ri hriat tur ala awm zauh tih chauh loh chu nungcha thawm hriat tur a han awm ta miah lo mai hi a khawharthlak ngawih ngawih a ni. A chhan ngaihtuah ila keimahni vang bawk a ni si hi a pawi a, mahni hrehawmna atana hetianga kan han ti duh tlat mai thin hi a dik lo a ni. Sorkar atang hian khauh taka hmalakna kan neih mai bakah khawtlang leh kohhrante ngei pawhin helam hawia hmalakna kan nei that loh chuan nakin lawkah kan ram hi Thlaler ramroah kan la chan lo ang tih pawh sawi har tak a ni.
Hla siamtuin ‘kan zoram tlangram nuam hi chhawrpial run i iang e’ alo tih thin hi tunah meuh chuan phul ramngaw chhia leh nungchate tan ngei pawha chenna tlak lohin kan chhuah zo ta chu a ni ta mai si a, kan tu leh fate tana boruak tha leh thinghlim hi ala awm lo mai ang tih mai turin kan nawm kan makin kan sawisa a, reilote hun chauh kan thlir thin avangin kan ram leilungin a tuar a, vawiin thlengin ala tawrh belh zel chu a nih hi. Kumin thalah ngei pawh hei hmun tam takah lo vah halna khu kan hmuh rualin kum dang ai zawngin zan lama tuikang nghak pawh kan tam zawk niin a hriat lehnghal a, a chhe lam hawi hian kan kal zel zawk em ni tih tur a ni hi a pawi ngawt mai. Kan tui semtute lah kan thiam tawpa tlawn lungawi hmasak phawt loh chuan tui min pe tha duh lo emaw te a han ni bawk a. Tui telloa nikhat pawh kan khawsak theih miau siloh avangin kan thalaite tan ngei pawh Cell Phone changkang tak nena tuikang nghah chu zah hleihtheih a ni ta meuh lo a, tunhma lama tuikang nghahnaah mipa an lal tihte pawh chuan awmzia a nei tawh chuang hauh lo a, khaw eng pawh zah lem chuang hauh loin tui pawh kan inchuh ta hial a nih hi.
Khua chauh a thal lo a kan thlarau nun thleng hian a thal chho ta zawk em ni tih tur a ni a, kan titi duhzawngte ngei pawh thlarau nun chawmna lam aiin thu ho mai mai leh fiamthu lamah kan kal ral zo ta!

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427