Filmstar lar boral ta Marilyn Monroe-lem an ziah chu May thla khian lilam a ni dawn ta a, a lo berah $maktaduai 200 vela lei chhuah theih beisei a ni.
Christy lilamna hmunpuiah hian Andy Warhol-a ziah, 1960 chhoa pop icon Monroe lem hia ngaihven a hlawh hle a, ‘Shot Sage Blue Marilyn’ tih hmingpua ziah hi kum zabi 20 chhunga lemziah zinga manto ber ni turin a dingchhuak ngei dawn ta. Warhol hian Marilyn-i lem panga a lo ziak tawh a, screening technique a hman vangin sawifiah thiam harsa khawpin a dah chungnung hle a ni.
Lilam atanga sum hmuh zawng zawng hi Zurich khawpuia Thomas and Doris Ammanna Foundation-ah a lut vek dawn a, khawvel pumpuia naupange nun chawikan nana an hmalakna kal zelah a bo a bang awm lovin an chhunglut ang.
Kum 2013 khan Warhol-a lemziah ‘Silver Car Crash (Double Disaster)’ chu $Maktaduai 105-a lilam fel a lo ni tawh bawk a, a kutchhuak hian hlut a hlawh.
Marilyn hi 1950s leh 1960s tir lam thleng khan sex symbol ang hiala dah chungnung niin, a hawina lam apiangah mipa ho an thle dual dual, a tih theih a, a hun lai khan amah aia hlawhsang leh tam an awm lo. A film chan te atanga sum lut kha $maktaduai 200 chuang a tling a, tunlaia $billion 2 vel anga chhut a ni hial.