Auto Corner
by Ruata
Royal Enfield chuan bike thar an nei chho mek zel a. Tunah hian an lirthei zinga a hmasa leh hlun ber, kum 1950 chho atanga design ngai deuh renga an la tihchhuah Bullet 350, Standard 350 tih tea sawi thin bawk chu an khawl thar leh hmanraw tharte nena thuamin an rawn tichhuak leh dawn ta a, tunah hian kawngpuia an enchhin thlalak a darh leh nual tawh a ni.
Design
Next generation Bullet 350 hian a hmaa a neih ang retro inspired design a neih chhunzawm ang a, hetihrual hian thlak danglam a rawn awm neuh neuh dawn thung a ni. Chiang taka a thlalak darh atanga lang thei chu a tail light thar tur hi a ni a. Hei bakah hian fender thar, headlamp design thar, single piece seat a hmaa a neih ang, amaherawhchu padding leh pillion grabrail thar tel te a nei dawn a ni.
Bullet 350 thar tur hian Meteor leh Classic 350 thar te a awm ang dual cradle frame a rawn neih ve tawh hmel a. A hma chuan single downtube frame a nei thin a. A thar tur hi chuan frame chak lehzual a nei tawh dawn tihna a ni. A hmalamah hian fork lian hret a rawn nei tawh ang a, a hnung lam suspension, rear shocker pawh lian leh rinawm lehzual a rawn nei tawh dawn a ni. Heng zawng zawng hian a hma aiin khalh a ti nuam zual ang a, a nghet lehzual viau dawn bawk a ni.
A kentel tur hrang hrang
New Generation Bullet 350 thar turah hian Royal Enfield lam chuan Classic 350 aiin kentel neuh neuh an rawn dah tlem zawk rin a ni a. Hei hi a model hniam leh tlawm zawk a nih vang te pawh a ni awm e. He bike thar tur hian a hmalamah disc brake a hmang ang a, a hnunglamah drum brake a nei dawn a, single channel ABS a nei dawn a ni.
Classic 350 thar leh Meteor tea kan hmuh ang switchgear chu he bike thar turah hian kan hmuh leh hmel a. Hei hi tuna Bullet 350 in switchgear a neih ho aiin a thain a changkang lehzual viau dawn a ni. Semi-digital instrument console a nei ve dawn em tih a la chiang lo a, hei hi chu reiloteah kan hre chho turah te pawh a ngaih theih ang.
A khawl
Royal Enfield Bullet 350 thar tur gian Classic 350 thar leh Meteor 350 a kan hmuh ang 349cc, air cooled, single cylinder khawl a hman ve hmel a. He khawl hi a khawl hmasa aiin a dam a, a hmaa pushrod actuated khawl ai chuan a tha viau tura beisei a ni. He khawl hian transmission lamah 5-speed sequential gearbox a nei dawn a ni.
Tlangzarh hun tur, a man leh elpui
Next Generation Bullet 350 hi kumin kum tawp emaw nakum kumtirah an tlangzarh hman beisei a ni a. A hma ai chuan he bike thar tur hi a to belh ngei ngei dawn a, tunah hian Bullet 350 chhuak mek hi Rs. Nuai 1.45 atanga Nuai 1.60 inkar bawr vel (ex-showroom) manah a inkhung a ni.
Royal Enfield hi chuan elpui ang zawnga chhut chuan a bike ngainatute tan chuan elpui pawh neilo, amah ngawr ngawr ni tein a ngaihtuah theih a. Market lamah chuan a elpui awm nia lang ho Honda CB350 H’ness, Jawa, and Benelli Imperiale 400 te a rawn el turah a ngaih theih bawk ang.