Kumin a Premier League Hall of Fame a player lakluh hmasak ber ni turte puan an ni a. England forward Wayne Rooney leh Arsenal legend Patrick Vieira te lakluh an ni dawn.
Rooney hi Premier League chanchin a goal khung hnem ber pahnihna niin goal 208 a khung a. Everton leh Manchester United tan khelin United-ah hian Premier League title vawi nga a chawi.
France midfielder Vieira hi Arsenal tan season 11 a inkhelh chhungin Premier League title vawi thum a la a. Kum 2003/04 chhunga ‘Invincibles’ team a captain a ni.
An pahnih hian Hall of Fame a lakluh player 9-na leh 10-na an ni a. Alan Shearer, Thierry Henry, Eric Cantona, Roy Keane, Frank Lampard, Dennis Bergkamp, Steven Gerrard leh David Beckham te hnung an zui.
Premier League Hall of Fame hi kum 2020 khan hawn \an a ni a, Covid 19 avangin kalpui hun kum khatin a tlai a. Nikum khan lakluh hmasak ber ni turin a kum hmasa berah mi paruk an lalut.
Kum 1992 a kalpui \an league a player hlawhtlingte leh thawhhlawkte chawimawina tura tih a ni.
Lakluhte hian chawimawina medal lian an dawng vek a, an duhthlan charity-ah an pualin Pound 10,000 Premier League chuan a thawh \hin bawk.
Kuminah hian lakluh theih tur player 25 phochhuah an ni dawn a, heta \ang paruk thlan tur niin fans te pawhin an vote thei ang.
Beiseiawm a\anga ropuina tawn tlangtu
Kum 16 mi niin Rooney-a’n Everton tan thawm ring tak neiin bul a \an a. Arsenal lakah Goodison Park-ah chakna goal a khung.
Kum 2004 August khan Pound maktaduai 30 tling \ep in Manchester United a zawm a, Old Trafford a player ropui zingah a tel zui.
United a kum 13 a hman chhungin Rooney hi club chanchin a goal khung hnem ber a ni a, United tan Premier League bikah goal 183 khung a khung a, PL a United tana goal khung hnem ber a ni bawk.
Kum 2009-10 season khan Premier League Player of the Season a thlan a ni.
Kum 2004/05 leh 2010/11 khan a goal khung ropuite chu Premier League Goal of the Season a thlan an ni ve ve.
Championship club Derby County enkawl mek Rooney chuan, “Premier League Hall of Fame-ah hian mi ropui tak tak lakluh lo ni tawhte kianga ka tel ve tur hi ka tan thil ropui tak a ni.”
“Ka hriat theih chin a\ang Premier League hi ka en \hin a, professional footballer nih a goal khung a trophy tam tak chawi hi ka duhthusam a ni \hin a. Premier League vawi nga ka chawi thei hi ka vannei hle. Mimal tak pawhin Hall of Fame hi ka tan a hlu a, ka hnuhmate hriatreng zui a ni tur hi ka lawm.” tiin Rooney chuan a sawi.
“Ka lo thiamzia min hriatthiam tir”
Kum 1996 a AC Milan a\anga Arsenal zawmtu Vieira hian a season hnihnaah Gunners a hlawhtlinpui nghal a. 1997/98-ah Premier League a vawikhatna atan a chawipui.
2000/01 season khan Premier League Player of the Season a thlan niin 2001/02 leh 2003/04 ah te league title an la leh a. Hetihlaia a teammate pahnih Thierry Henry leh Dennis Bergkamp te hnungzuiin Hall of Fame-ah lakluh a ni.
France midfielder hian Premier League game 307 a\angin goal 31 a khung bakah assist 34 a nei a, kum 2011 a football a chawlhsan hma in Manchester City tan season khat a khel hman.
Crystal Palace enkawl mek kum 45 mi chuan, “Premier League Hall of Fame a lakluh ka ni hi ka tan thil ropui a ni a, ka hriat tirhin Senegal a khawlai a ball pet \hin naupangte kha ka hrechhuak a, Paris khawdai a khawlaia inkhelh te ka hrechhuak.”
“Premier League a player \ha ber te nen, khawvela league \ha bera inkhel \hin te nen kan han awm ho ta mai hi ka suangtuah phak a lian a ni a. An zinga ka hming lam tel ve a ni hi ka chhuang a, ka lo thiam hle \hin a ni tih min hriatthiam tir zual.”
“An zinga ka inkhel hman a, team khata ka telpuite an awm bawk hian ka football khelh hunchhung khan ropui takin ka khel tih a tilangin ka hria a. Ka lawm em em bawk chu \hangthar midfielder ten min an an duh thu an sawi hian min ti hlim \hin.” tiin a sawi ve bawk.