Aizawl: Vety minister Dr K Beichhua chuan vawk pul hri, African Swine Fever leng a darh zel lohna atan department hriatpuinaa vawk an suatsakte tana sorkar laipuia zangnadawmna an dilsak chu 1st Installment tur an rawn pe tawh tih a sawi.
Dr K Beichhua chuan vawk an suatsakte hi central sorkar, Ministry of Fisheries, Animal Husbandry & Dairying-in scheme a neihsa anga zangnadawmna pek tur a ni a, hemi atan hian state sorkar chuan Rs 11,69,94,414 a dil tih sawiin, Thawhlehniah 1st installment atan Rs 5,84,97,000 an pe tih leh an dilna hlawhtlinna an hmu ta chu lawmawm a tih thu a sawi.
Vety minister chuan vawk an suatsakte hnena zangnadawmna an pek tur chu sorkarin fel takin a chhinchhiah vek thu sawiin, an document pawimawhte pawh a kawl vek tawh tih a sawi bawk a, tun atanga hun reilo teah an pekchhuah theih thuai a beisei thute, central sorkar atanga sum an hmuh atanga za zela 50 hi state sorkar tum tur a ni tih a sawi bawk.
Vawk thi pangngaite zangnadawmna chungchang erawh DM&R Department kaltlangin khuarel chhiatna, natural calamity anga puantir an tum chu sum leh pai harsatna avanga a remchan loh avangin Planning & Programme Implementation Department-ah sum an dil thu Dr K Beichhua chuan sawiin, sorkar kumtharah pawh bawhzui zel an tum thu leh beiseina sang tak an neih thu a sawi.
Vety minister chuan Mizoramah ASF leng a reh tan tawh nia an hriat laiin, Sakawrdai lamah vawk 111 a thih belh tih thu bakah Champhai district-a 59 thite chu ASF a nih tih a finfiah tawh thu leh fimkhur a tul tih a sawi.
ASF vang hian Mizoram pumah vawk 33,417 a thi a, AH & Vety Department hriatpuinain vawk 10,910 suat a ni bawk.