Vawk hri leng tuartute ngaihsak chhunzawm zel nise
Hri leng karah Mizoramin Vawk hri leng kan tuar tel a, vawk vulhtu tam takin hri leng vangin an vawk vulh an chan a, an tawrhna hi nasa tak a ni. Innghah nana hmang an nih miau avangin pawisa tam tak an seng ral a, Mizoram sorkar atangin chhawmdawlna an dawng thei bawk si lo. Central sorkar na zawka an dawr a ngaih phah a, central chuan tlemazawng a rawn pe ta niin Vety minister in a sawichhuak ta bawk. Engpawhnise, a lawmawm lamah ngai phawt ila, dawn kim hun erawh a nghahhlelhawm tawh hle.
Vety Minister Dr K Beichhua chuan vawk an suatsakte hi central sorkar, Ministry of Fisheries, Animal Husbandry & Dairying-in scheme a neihsa anga zangnadawmna pek tur a ni a, hemi atan hian state sorkar chuan Rs 11,69,94,414 a dil tih sawiin, Thawhlehniah 1st installment atan Rs 5,84,97,000 an pe tih leh an dilna hlawhtlinna an hmu ta chu lawmawm a tih thu a sawichhuak a, a dang zel pawh hi hlawhtlinna hmu thuai thei se a tha hle bawk.
He vawk hri leng hi reh nghal vek a la ni lo a, vawk vulhtute tam tak thla a la phang a, sorkar hian ruahmanna tha zawk leh fel zawk neihpuiin, dan lova vawk lakluh thlenga khauh leh khirh zawka ruahmanna a siam hi a la tul a, chumi enzui kawngah pawh chuan nasa zawka tan la in, sorkar laipui lam pawh chhawmdawlna lehpek a awm thuai theih nan nawr nasa lehzual bawk teh se.