Mizorama solar cold storage hmasa ber tur, KVK Khawzawla bun chu nimin khan Deputy Chief Minister Tawnluia’n a hawng.
Khawzawl Bawrhsap C.C. Lalchhuangkima kaihhruai hawnna inkhawmah hian Deputy Chief Minister Tawnluia chuan Mizorama solar cold storage hmasa ber tur bun fel a ni thei chu lawmawm a tih thu sawiin, science thiamna leh remhriatna lova hmasawnna a kal tak tak theih tawh loh avangin nakin zelah a la pawimawh deuh deuh dawn tih a sawi.
Tawnluia chuan thil hlu tak leh rotling, thlai leh thei vawn \hatna hman theiha hawn tak chu neitu thinlung pu chunga uluk taka enkawl a \ul thu sawiin, lo neitute leh huan siamtute tana chhawrnahawm tak tur, solar cold storage chu Khawzawl district mai ni lo, Mizoram pum tana \angkai taka hman a nih theih a beisei thu a sawi bawk.
Nizung chakna hmanga thlai leh thei thar chhuah vawn \hat theihna tura ruahman, solar cold storage hi nikum December thla khan KVK Complex, Khawzawl thlenpui a ni a, kumin January thla tir khan bun fel a ni.
A enchhin nan January 16 khan serthlum eng emaw zat temperature chawhrual 6.2°C leh humidity 92% vela dahin vawn \hat chhin a ni a, hemi hun chhung hian enkawlna senso a awm lo a, vawiin thlengin a him dam a, laboratory-a endik tura sample lak a ni.
Khawl bun fel hna hi MISTIC kaihhruaina hnuaiah a siamtu company engineer-ten an thawk a, a enkawl chhunzawm zel dan tur ngaihtuahtu committee a din a ni.
Solar cold storage chhungah hian thei/thlai metric ton 10 a dah theih a, temperature a vawn theih hi 4°C leh 20°C inkar niin, humidity hi 85%-95% inkar a ni a, Mizorama thei leh thlai thar chhuah lar zualte chu hemi temperature leh humidity huam chhungah hian vawn \hat theih tura ngaih a ni.
KVK Khawzawla solar cold storage hawnna inkhawm tawi buatsaihah hian Veterinary, Fishery and Sericulture Board Vice Chairman C.Lalmuanpuia, MLA leh MISTIC Chief Scientific Officer Er. H. Lalsawmliana ten thu an sawi bakah MISTIC Scientific Officer Joel Lalbiakkima’n technical report a pe.