- PL Liandinga
Airport siamna concrete chhun a chim a, Mizoram sorkar atangin a thawktu chunga mawhphurhna bel thawm reng reng a awm lova. Sorkar hmalakna kha a chim tawp a, sorkar thuchhuak ni deuh bera lang chu, “Ama sensovin a siamtuin a siam leh vek ang,” tih deuh zawng a ni.
Tunhma chuan hetianga chhiatna a awm hian mawhphurtu an awm thin a. Mipuiin mawhphurtu anga kan ngaih loh thleng thleng chungah te hian sorkarin hremna a lek thin a. A chang phei chuan a Minister te hian (ramdangah phei chuan) banna an thehlut thin. Tunah chuan kan sorkar atang chuan mawhphurhna latu zawn thawm reng reng a awm ta hauh lo mai a. A mak hle mai tih mai loh chu sawi tur a vang letling.
Congress hunlai khan lei kha a chim fo mai a. A mawhphurtu-ah Opposition khan sorkar an puh nasa thei hle mai a. Bang tur te pawhin an nawr ngat ngat thin. Kan ram hi sorkar hnathawkte vanram a ni ngawt mai tih hi a lang chiang leh thinin a hriat. Sesawng leh Khawruhlian inkara lei dawh lai a chim a, mi an thih pawh khan hremna lam chu a lang lo hlein a hriat a. A mimal kan va huat vang ni lovin sorkar kalhmang kan lo hriat ve dan leh kan Mizoram sorkar kalphung hi chu a inpersan ta tulh tulh mai.
Tunah hian Mizoram hmun hrang hrangah NABARD pawisa kan puk hmangin sikul sak that a ni a. A nihdan tur lovin sikul engemawzat sak ni ngeiin a lang. Hetah pawh a tihtirtu leh a enkawltu tur sorkar hnathawk lam chu kan rilru pawhin a tinzawn tawh meuh lo.
He kalphung hi a mak hle mai a. Hetiang a nih chuan kan Minister-te hi hmun tina awm thei leh engkim ti thei ang hiala an awm a ngai dawn ni te pawhin a lang a. Mahse chutianga mawhphur tur chuan anmahni leh anmahni an insiam chawp a. An hnuaia sorkar Department a thawk, hmun tina awm thei tur te chu mawhphurhna zawng zawng chhuhsakin an awm tihna a ni thei ang. MNF term hmasa lamah khan Minister pakhat chuan tuk khatah mi zahnih te a hmuh a tul thu a sawi thin a. A peih mai mai hi ka lo ti khawp a. A hnuaia Secretary te, Director te, Deputy Director te chanpual zawng zawng chhuhsakin amahin mawhphurhna a inpe chawp tihna a ni mai.
Chutiang deuh chuan tun tumah pawh sikul sak hna a chhiat viau hian a bialtu DEO te, SDEO te leh CEO ten mawh phur ta lo chuan a changtu Minister hian mawh a phur tawp mai tur ni awm tak a ni. Contractor ten hna an thawh that loh chuan a enkawltu tura ngaih CEO atanga DEO emaw, Director te emaw chuan mawh phurtu tur an ni tih pawh hriat theih loh khawpin sorkar hnathawk te kal kanin hna kan inpe tihna ni awm tak a ni.
Tuna kan Airport chimah pawh hian PWD lama a viltu, JE atanga E-in-C inkar tu ber emaw hi chuan mawh hi phurh awm tak a ni a. Mahse heng hi kan sorkar hotute chuan an zawt fiah ngam lo ni berin a lang. Contract an pek tirh atangin a Department hian an kalphung an kengkawh thei lova, chuvangin a chhiat thuah pawh mawh phurhtir leh chi an ni lo ni ngei tur a ni.
Khawthlang lamah lei dawh tur, la zawh loh nasat luat tuk leh chhe lutuk mai, a awm ni awm takin ZMP Tlau te thuziak atangin kan lo hria a. Thil awmzia lah kan hre lo nasa a. Engti tihin nge khatiang em em a an hna kha a chhiat theih? Engatinge chu leh chen chen an thawh tawh hnuah pawh heti chen chauh an la thawh si? Zawhna tam tak a awm thei. Pawisa an la tawh em? La tawh se engzat nge an lak tawh? Kalphung a dik loh tawh laklawh chuan thil a buai nasa thei em em a. Chung avang chuan sorkarin tihdan tur kalphung a nei thin a. Mahse chung chu kan sorkar chuan chunglam atangin an thuneihna hmang sualin an bawhchhe ta zar zar a. A tawpah thil a lo pawi hnu chuan mawhphurtu kan awm ta thin lo a ni.
Thil tam tak hi finrawl thawhin awlsam leh hlawk tak anga langin a tih mai theih a. Mahse chutiang chu a tlo lo fo. A nih lohdan tur kawng zawh a awl a, a tawpa a buai chuan buaina a chhah zual bik thin. Hetianga tihdan dik lova thiltih pawi lehzualna chu mipuiin kan tuar chawk a. Mipui pawisa hmangin mipui pawi kan sawi tihna a ni a, chu chu thil tha lo leh hnam tan thil pawi tak a ni thin. Chutiang thil pawi chuan kaihhnawih a nei chawk lehnghal a. Mihring a tivir a, mihring a tiduham a, misual an thawven laiin mi dik an chep thin.
Tun thlengin kan Lengpui Airport sak lai chim chungchangah sorkar chuan hremna lam thu pakhat mah a la chhuah lova. A satuhi chu kan va vulh nasa tehreng em!