Somalia ram lailia Beledweyne khuaa hmun hniha thihchilha bomb tihpuah mi 15 vel an thi a, an zingah hian Somali Federal Parliament-a member hmeichhe pakhat a tel.
Prime Minister Mohamed Hussein Roble chuan Amina Mohamed Abdi-i thihna chu ‘amah tuma thahna’ niin a sawi.
Thi dang zingah hian MP lo ni tawh \hin, Hassan Dhuhul leh Somali sipaite an tel bawk.
Chanchinbute chuan hliam tuar zingah ngaihtuahawm tak tak an awm avangin thi zat hi an pung thei niin an tar lang.
Somali President Mohamed Abdullahi Farmajo chuan Abdi-i a ui thu leh a sunna thu Twitter-ah a tar lang.
Somali National TV chuan thite hi an thlalak nen Twitter-ah vek a tar lang bawk.
Beledweyne khuaa thihchilh bomb tihpuah a nih hma lawk hian al-Qaeda firfiak pawl nena thawkho hel pawlin mi pariat lai an that bawk a, an zingah hian ram dang mi panga an tel.
He inthahna thlenna hmun hi an khawpui ber, Mogadishu-a Halane Camp an tihah a ni a, airport complex niin UN pisa leh ram dang palaite \huthmun a ni.
al-Shabab chuan Mogadishu leh Beledweyne khuaa tualthahna thleng hi anmahni tih a nih thu an puang tawh.
Islam hel pawl hi Somalia-ah hian an tam hle a, Horn of Africa an tih ramah hian anmahni avangin inthlan pawh rei tak tihkhawtlai a lo ni tawh.
al-Shabab firfiak pawl hi Africa khawmualpuia Islam kal firfiak tak an ni bawk a. Sorkar leh \angrual sipaite nena an inbeihna a nasatna hmunah phei chuan mi tam takin an chenna in chhuahsanin an raltlan phah a. al-Qaeda leh Islamic States firfiak pawl nen pawha inzawmna nei an ni.