Uruguay leh Ecuador te chuan World Cup finals khel turin an hmun an tichiang a. Brazil leh Argentina te hnung zuiin South America a Qatar pan tur chiang an ni tawh.
Uruguay in Zirtawpni zingah Peru 1-0 in an hneh a, Ecuador hi 3-1 in Paraguay lakah tlawm mahse Uruguay result avangin an dinhmun a chiang tawh.
South America qualifying-ah hian Peru, Colombia leh Chile ten pangana an la inchuh mek a. Pangana hian Asian Conferederation team nen playoff an khel ang.
Monteviedo-ah Estadio Centenario ah Uruguay in Peru an mikhual a. minute 42-naah Giorgian de Arrascaeta chuan inkhel a goal awmchhun a khung.
Peru hian huntawp dawnah goal-ah ball an vawrh luh chu Uruguay keeper Sergio Rochet chuan goal line chhungah a man niin an ngai a, mahse referee in goal-ah a pawm lo.
Estadio Antonio Aranda-ah Paraguay in coach Guillermo Barros Schelotto hnuaiah a vawikhatna atan hnehna an chang a. Robert Morales chuan minute 10-naah goal hmahruai khungin halftime hma in Piero Hincapie an neih belh a. Second half-ah Miguel Almiron chuan an goal thumna a khung hnuah Jordy Caicedo chuan Ecuador tan goal khat a khung ve bawk a. Match 8 chhunga a vawikhat nan Paraguay an chak.
Brazil tan Neymar leh Philippe Coutinho ten penalty an khung bakah Vinicius Junior leh Richarlison ten Chile lakah goal an khung.