Mizoram Under-25 cricket team chuan India ram pum huapa inelna Col. CK Nayudu Trophy-ah tun season a an match hmasa berah hnehna an chang nghal a. Zirtawpni khan Nagaland run 210 in an sawp.
Cuttack, Odisha a DRIEMS Ground a inkhelah hian Mizoram in an vaw hmasa a, an first innings-ah over 78.2 dingin run 194 an siam. Mizoram tan Jehu Anderson chuan run 66 a siam a, Sahil Reza leh F. Lalruatfela ten run 40 leh 28 an siam.
Nagaland in vaw ve in an first innings-ah run 142 chauh Mizoram in an siam tir. Mizoram tan kum 17 mi K. Vanrotlinga chuan Under 25 level a khelh vawikhatnaah wicket 5 a la a, F. Lalruatfela leh F. Lalmuanzuala ten wicket hnih ve ve la in Lalhriatrenga’n wicket khat a la.
Mizoram in second innings-ah run 398 an siam a. Jehu Anderson bawk che \ha in run 192 a siam a. Zothanzuala’n run 79 siam bawkin an innings tawp lamah Lalhriatrenga leh Vanrotlinga ten run 34 leh 30 an thawh.
Nagaland second innings-ah hian Mizoram tan Naveen Gurung chuan wicket thum a la a, Vanlalremruata leh Hriatrenga ten wicket hnih ve ve la in K. Vanrotlinga leh Muanzuala ten wicket 1 an la.
Col CK Nayudu Trophy hi ‘multi day format’ a khelh niin ni li chhung khelh a ni a. Mizoram hian hnehna an chan avangin Plate Group-ah point ruk an hmu nghal.
March 29 hian Arunachal Pradesh nen an inkhel leh dawn a, Sikkim leh Meghalaya te an la khel leh bawk ang. Plate Group a\anga a sang pahnihte Elite Group-ah an kaisang ang.
Mizoram team manager Laithanzuala chuan, “Toss-ah kan vannei a, vuak hmasak an thlang. Bul kan \an \hat rah kan seng a, kan naute an ding rei nen khawlum karah an player-te an chau a. An vuak ve \umin over 44 vel chauh an din avangin kan player-te an chau lutuk lo. Kha khan inkhelah awmzia a nei thui.”
“Kan second innings-ah kan lead bawk nen kan nauten an ngam hle a. Under 25-a an vawikhat khelhnaah Jehu Anderson leh K. Vanrotlinga te an che \ha hle.” a ti a.
“Nagaland hi team tha an ni a, hneh inbeisei taka hmachhawn chu kan ni lova, mahse bul kan \an \hat hnuah erawh kan nauten an ngam hle. Under-25 ah hian BCCI danin state pawn player neih phal a ni lova, state dangte hian he dan hi an zawm tha a nih chuan kan tum tur pathum awm zinga pakhat hi kan hneh fo \hin an ni a, a dang pahnih nen pawh hian kan intluk tawk hle.” a ti bawk.