- F. Vanlalrochana
ISUA AMBASSADOR
2016 a tih chhuah Mel Gibson-a film siam, Hackshaw Ridge kha kan entawh awm e!
The Conscientious Objector Tih Documentary atanga an siam a ni a. US sipai pakhat, Coropral Desmond Doss a chanchin a innghat a ni.
Indopui Pahnihnaa sipai nisi khan Silaiba keng duh tlat lo. Indo duhlo mi, pacifist a ni a. Sipai a ni si a, indonaah a kal angai a. Tha takin a hna a thawk a, sipai tha leh huaisen chawimawina Bronze star medal leh Purple Heart mai bakah Medal of Honor hial a dawng!
A damlai hunin a chanchin lehkhabua ziah te, film a siam te a duh lo thin a, a Rinna chungchangte nilo deuhin an tilang ang tih a hlau thin a ni.
Desmond Doss kha Isua Ambassador ropui tak a ni.
Keini pawh hian kan nitin nunah, kan zirnaah, kan eizawnnaah, Isua Ambassador kan ni tih kan intheih nghilh loh a tha hle.
Kristian Thalai Pawl rawngbawlna te, a huang chhunga kan tuina te hi a tha, a bak thleng se la.
Pathian kohhran ngaihsak miah lote awm dan anga awm ve tura thlem kan nih hunah te, kan nunah Lal Isua thuin min kaihhruai sela, Isua Ambassador kan nihna hi tihlan tur a ni.
Mi dang te pawhin an ti ve tho tia inthiam chawpna hi kristian thalai te chuan Kan ti ve tur a ni lo. Kan rinnaa awm reng tur hian tan tang tang angai thin.
Ringtu nihna chanvo ropui tak chang tawh siin, chhan leh vang hranpa awmwl miah loa mi dangte ngaihsan loh te kan ching a. Chapo vang a ni. Kan ngaihdan te hi miin an bwngkhawn lutuk loh turte lo sawi ve vak te hi a tul ber lem lo fo. Isua Ambassador te chuan social media hman dante pawh thiam deuh deuh a tha.
Mahni leh mahni kan in pawngpaw ngaihsan hi kan chetsual chhan a ni fo. GK Chesterton a khan a ma chanchin a ziahnaah “Angels can fly because they take themselves lightly ” tih hi a telh a. Tisa leh thlaraua hmasawn tur chuan nitin chapona hneh angai.
Ringtu, rawngbawltu, kohhran mi niawm renga awmin, kan hnathawhna leh kalnaa a pianga Isua Ambassador, a hming ti mawi a, a ram ti zau tur kan ni tih i hria ang u!
A LUAHTU AWM…
2005 khan Kum 88 mi Zairema chuan a nun a thlir kir a, “Kan mipa fa neih an kal takah chuan Thuhriltu thu ang deuhin engkim hi a lo ho hle. Kan thatlaiin theih tawp chhuahin kan tang a, in leh lote din kan tum a, a luahtu an awm mumal loh phei chuan a lo ho hle” tiin thutlukna a siam a ni. (Thian lehkhathawn)
In leh lo ropui takte aiin a luahtu tur mihring kan pawimawh a, silh leh fen mawi tak aiin a hatu mihring kan pawimawh zawk a ni.
Kan thih hlauh phei chuan khawvelah chuan Pu Zairema sawi ang hian a ho der mai dawn a ni.
A dama te hi inhmangaih ila, in ngeih ila. In leh lo leh thil dang hi chu a pahnihna a ni zawk e.
GANDHI-A SILIPAR
1985 khan Clifton Fadiman-a lehkhabu buatsaih “The Little, Brown book of anecdotes” tih chu mipui lei theihin a awm a. Mi ropui 2000 te chanchin tawi ngaihnawm deuh deuh 4000 zet khungkhawm a ni. He lehkhabu hi a larin hralh a tla nangiang.
He lehkhabu-a chanchin tarlan hmasak ber chu Gandhi-a chanchin a ni.
Tumkhat chu Gandhi-a kha relah a chuang dawn a. Rela a lawn kai lai takin a silipar khing chu a ti tla palh ta hlauh mai a. Rel chu a tlan tan tawh avangin a chhar thei tawh si lo. A chuanpuite mak tih deuh mai thil a ti ta a. A Silipar khing a la bun lai chu a silipar khing leh lam leia tla bulah chuan a zu theh thla ve ta mai a.
A chuanpuite chuan, engvanga chutianga ti mai nge a nih tih an zawh chuan, Gandhi-a chuan, “ka silipar lo chhartu khan silipar inkhing, a thar var a neih belh dawn a lawm”, tiin a chhang a.
Khi khi Fadiman-a lehkhabu-a a lan dan chin a ni. South Africa-a a awm lai a nih hmel.
Kan thilte hi kan tana tangkai tawhlo chu mi dangte tana pek mai phal hi nun hahdamna a ni.
SARUAK THLALAK – ART SHOW/ÂT SO
Engemawlai khan Nude Photo an tih ang tur hi ka hmu tam hle a. Art kan ti liam mai zel bawk a. Mahse, keini ang zingah chuan Art aiin ât lam a hnaih. Art Show niloin ât so kan ni zawk fo.
Sap ho pawhin saruakin thla an la ve fo mai a. An hausak pui lawih lawih a. Mahse, an Thalatuten an duh duhin an pho chhuak chhuak lo a, an lanna tur Media (Magazine etc) in a chhuah hun turah an ti chhuak thin.
Tin, han ti hluai ila. Saruak lem te kerin, saruak lemte chu an ziak ve fo mai.
Renaissance hunlaia an kutchhuak hoah khan mipa saruak thla leh lim lam a tam a. A bikin Michaelangelo kutchhuak- ah a tam em em a.
Hmasang Greek ho sulhnu-ah a tam bawk.
Baroque atangin hmeichhe saruakah an lut tan a. Rodin-a te chuan mipa sarual an la hmang tho. Impressionist ho phei chuan Hmeichhe saruak an uar leh zual a, cubism ah (picasso etc) te pawhin hmeichhe saruak deuh zel an hmang chho.
Hmasang greek ho hunlai chuan heroic nudity tih nen a inzawm thui hle. Thahrui chakna an ngaihsan vanglaiin mipa saruak a tam a, landan mawina in khawvel a tih buai chhohin hmeichhe saruak a tam chho ni maiin ka hria
Baroque Period atanga hmeichhe saruak lemziah leh lem ker hi an uar tan.
Lemziah leh lemsiam lam chu thuhran nise, thlalakah hi chuan khawvel thlir dan a dang hret niin a lang. Saruak thlalak tarlang thang deuh chanchinbu an nih loh phei hi chuan lo tih chhuah ve ngawt ngam a ni lo. Sawisel an tawk ta viau. Kum zabi 21naah hi chuan thil thlirdan a inthlak deuh daih ta zawk.
Mipui hmuha pho chhuah phei chu fimkhur angai tawh khawp a. Dennis Barrie te phei chuan hrem an tawh phah hial a ni.
Donald Trump-a nupuiin tun hma kum 20 chuang kal taa, Magazine kawma saruaka a lanna chu tun hnuah an phawrh thar sak leh a nih kha.
Hnam dang Model chuan, saruaka thla an lak dawn meuh chuan news a tling thin a. Model tam tak chuan an duh bik kher lo. Playboy, Penthouse, Sports Illustrated vela lang chin chu a lang awm tak an ni e, an ti fo mai.
Pirelli calendar a lang pha chin Model te pawhin thalatu nazawng hmaah an in phelhin, an inpho duh miah lo mai.
Keini chu kan saruak thla, inphelh ruaka kan in pose na hi social mediaa post-ah a kal ral mai mai a.
Mihring taksa hi ruaka awm a tul lem loh avangin thawmhnaw ha kan ni a. Miin Pawisa hmuh duha a lo ti a nih pawhin a thu a ni e. Mahse, Mi hmuh tura in phelh ruak tur meuh chuan, India Rupee phek engemaw zah ni ve rawh se. Chu chu a hlu chiah em tih hi ngaihtuah theih tak a la ni bawk.
Saruak Thlalakah phei chuan, a thlalatu rilru lam hi a nia an chai daih tawh zawk ni, mak ang reng si, mak si lo a ni.
Nun dan thiam hi a har a. Mahse, a zir theih a ni. Modelling te pawh hi taimaa insum theih a, tih tak tak chuan, thui tak a thlen ve theih tawh ang. Mahse, awmze nei ni rawh se. Mi dang thurawn la thiam ila, “ka ti duh angem?” “A tih chi angem?” tih zawhna hi zawh fo tur a ni.
Henry James-an The Portrait of A woman tih a ziahah chuan, a changtunu chu Hmeltha leh talent nei tha tak a ni a, ro tam tak a ro chung a. Mahse, ho lam takin a nun a khawhral a . “What have you done with your life” tih zawhna a dawn phah ta a ni. Kan talent leh kan theihna, kan nun hi ho lam taka khawhral loh tur a ni, kan nun dan erawh kan thu chu a ni teh meuh mai.
Hlawk siloa ruak chu a ho ang reng khawp mai. Hlawk avanga ruak pawh a hlu kher chuang lo a. V** Camera tih vel chuan thupna thlalak neitu chungah chuan, hnam innghahna tlak fa hring tura beiseina neih a har.