- Zirsangkima
Pu Ngèna chu officer a nihzia a awmna véng mite hian kan hria; a ni, chiang takin kan hria. Sawi sawi lo mah se, a motor hmaa a nihna inziahnaah pawh chuang lo mah se, pisa pawh kai ngai lo mah se; an chuktuah huanah ni léngin hna thawk mah se, officer a ni tih kan chiang êm êm. A in ropui—a hminga nuai li nga chauh loan laa chhãwng riata sánga a sak theih dàn a\ang hian officer-ah pawh officer namai lo tak a ni tih kan hre êm êm a ni. Mahse, chu a in ropui takah chuan véng mite kan léng lût ngai lo. Buhfai\hàm leh an fate Faith Promise khawn tùr paw’n kan inhnawn nasa hle \hin.
A pisaah pawh a hnuaia thawk mi tam tak an intlar thla duat ang tih kan ring thiam ve vek a. A chhan chu, a lalna ram, a pisa pèla ro rèl a tum phêt \hin vàng a ni. Chumi awmzia chu, a thuneihna hmun, a pisa piah lamah, in chhúng leh véng chhúngah a lal chhunzawm ta \hin a… Chu chu kan véng paràwn chin mai ni lo, nepnawi dàwr tê nei chin thlengin kan ‘ei’ viau lo!
A derin amah chu kan zah a, a lem lemin amah chu kan ngai sáng! Officer sáng tak niha in chhàwng sáng sa thei nihnaah hian zahawmna a awm kher lo!
Pu Nèna \henawmpa, Pu Bèla pawh hi officer ve tho a ni. Mahse, véng chhúngah a hmél hmuh tùr a awm ngai lo! A chhan chu, khaw dangah, hla tak takahte an transfer \hin vàng a ni. In ropui a nei lo. A hmingin in te chu nei ve e, chhãwng erawh a nei lo. A nupui fanauten an in chu an luah khah hneh viau bâkah Pu Bèla te chhúngkaw bèla thingtlang lam a\anga an hnêna lehkha zir an awmpui ve reng bawk \hin.
A hna thawhna a\anga an nu nèn an rawn hàwn cháng hian an inah véng pa leh nuho, sawrkar hna thawk leh thawk lo te; SEDP dawng tùra ngaih chin leh dawn inbeisei lo hrim hrim te; chakai eia thak tlat \hin te leh bekang um ei sual tawh te; sahdah al hmuam leh a al lo thlangte chena an len vek avàngin an \hut-pindan leh an chokaah kan kan \hu khat hmur \hin.
Amah Pu Bèla hi pa \awng tam lo tak leh rualpàwl thiam tak ni lo mah se, kan vénga a awm hi chuan véng mite thlá hi zu muang tlat zêla maw le! Chu chu officer a nih vàng leh thil eng emaw min tihsak theih kan beisei vàng pawh a ni miah lo. Amahah hian kan thlá a muang tlat \hin a ni.
A derin amah chu kan zah lo a, nél taka amah kàwm bawrh bawrh chungin amah chu kan zah tlat tho a; a tak takin kan ngai sáng a ni. Officer sáng tak niha in chhàwng sáng sa thei lo nihnaah pawh zahawmna a awm thei tho a; rual kawm thiam lo pawh an zahawm thei tho!
Upa Zêla hi kan kohhran Upa min a ni. Tlangvàl lai a\anga kohhran Upa ni tawh a ni, an ti. Zial a zu ngai lo a, pánkhàwr pawh a ei ngai lo. A bulah chuan tlangválho paw’n zial zûk chu sawi loh, \heh pawh an in\heh ngam ngai lo. Amah zirtírtu lo ni bawk nèn; mi zawng zawng en tawn tùra nun a tum emaw ni tih tùr khawpa ‘mi famkim nih tum’ ni ber hian a hriat. Engtik lai mai pawh hian a inhmuam ûp reng a. Páwn a chhuah hlekin kawrchung nèn a inthuam ap reng a; Bible a zakzeh reng lo chauh a ni.
Khawlaia a zirlaite leh a zirlai hluiten, ‘Good morning/evening Sir,’ tia chibai an bûk hi nuam a ti êm êm a; lu bu nghutin a chháng \hin. Dàwra thil a lei paw’n pawisa nawi kìr a ngai ve ngai lo; pawisa nawi zawng zawng nèna inring lâwk veka thil lei \hin mi a ni; a thil lei man a pe dik thlap zêl.
Zirtírtu a nihna leh kohhrana Upa a nihna a zahawm tehrêng nèn, miten a tih dàn leh a kal dàn; a party \an lam mi leh sa a melh dàn leh a ‘ei’ viau lohho a melh dàn a rûkin an zirsak nasa \hin hle a; a inhmuam ûp lutukna te chu mi’n fiamthu thawh nan an hmansak fo.
A derin amah chu kan zah a, a lem lemin amah chu kan ngai sáng! Kohhran Upa senior nih vànga inhmuam ûpna leh hna zahawm zirtírtu hna thawhnaah hian zahawmna a awm kher lo!
~
A nih leh zahawmna awmna chu khawiah nge? Kan in chhàwng sáng sak theihnaah te, mi nazawng thawh phâk loh hna sáng thawhnaah te, páwn lama zahawm tum luat vànga inhmuam ûp leh lutukna lamah te leh intih ropui leh lal riaua inhriatna hmunahte zahawmna chu a awm kher lo. Zahawmna awmna chu kan thinlungah a ni. Kan rilru leh kan thinlungin a duh chu a takin páwn lamah kan lantír \hin si a.
A tak taka (tûnlaiah chuan ‘a tak taka’ tih kher a ngai tawh!) \hatna te, ngilneihna te, mi rethei leh pachhia khawngaihna te leh tlàwmna te hian zahawmna a keng tel fo. Kan nihna leh kan hna thawh te hi a zahawm viau maithei; mahse, chu chu kan zahawmna a ni kher lo; a thawktu-in ka zir miau loh chuan mi’n min zah chuang lo ang. Pastor leh kohhran Upa pawh ni ila, officer leh MLA pawh ni eng ang mah ila, kan vêla mite tána mi hnawksak leh mi ninawm kan nih miau chuan, kan hna thawh zahawm ang hù-in mi zah kan kai lo thei.
Chuvàngin, hei hi i hre reng ang u: mi dang tána inphah hniam ngam khawpin huaisen ila; mite fak hlawlh phût leh beisei kher loin mahni lãwm veng vengna tùr khawpin hna thawhnaah rinawm ila; mite mit hmuh leh hriat kher loah pawh dikna \an ngam ila; zah tlâka zahawmin kan hnà leh kan koa mawhphurhna awm zahin nun uluk bawk ila … kan hriat loh leh kan tum rêng vàng pawh ni loin mi zah kan kai mai ang. Zahawm nih tum ngar ngara nun hman tum zawng a hahthlâk êm mai a!