Rorel lai, TMC hruaitu pawh thu zawt fiah
Central Bureau of Investigation (CBI) chuan tun hnaia West Bengal, Birbhum district-a an chenna in halna thleng, mi pariat thihna leh a hnu lama politics-a inbeihna nasa tak thlen phahna chu a tituah mi 21 a puh.
CBI-in a titua an puhte hi a hmaa state police-in an chhuinaa a titua an puhte tho kha nia sawi a ni.
Police tih loh ang deuhvin state-a rorel lai, Trinamool Congress block president Anarul Hossain chu thu an zawt fiah tel thung a, man zui a nih a rinawm bawk.
Kar kal ta tir lamah khan Birbhum-a Rampurhat khaw bul, Bogtui-ah chhungkaw pahnih chu pawn lamah an chenna in kalh hnanin hal khum an ni a, mi pariat, hmeichhia paruk leh naupang pahnih an thi a. A tam zawk hi chhungkaw khata mite an ni a. He thil thlen hnu lawkah hian mi 20 vel man zui nghal an ni.
He beihna thleng hi a hma lawka helai vela Trinamool Congress hruaitu pakhat, Bhadu Sheikh-a bomb hmanga beia thahna phuba lakna nia sawi a ni bawk.
Chief Minister Mamata Banerjee-i’n Bogtui a tlawhnaah Anarul Hossain-a chu police hnena thil thleng a hrilh duh loh avang leh pawikhawihna thlenna tur a puih avangin man turin a ti a. CBI-in thu zawh fiah tura an lak dawnah Anarul Hossain chuan, “He thil hi ka khingpuiten min phiarhna vek a ni,” a ti.
CBI team hian Rampurhat-a sorkar khualbukah awmhmun an bengbel mek a. Senior officer Akhilesh Singh-a kaihhruai niin in\hen darhin in hal pakhat zawk, Sona Sheikh-i in an tlawh hmasa a ni.
Thi tam zawkte ruang hi he in a\anga hmun hi a ni a, an zingah hian tun hnai lawka innei thar, Lily Khatun leh a pasal pawh an tel.
CBI chuan an thil chhuia an hmuhte chu April 7-ah Calcutta High Court-ah thehlut tura tih an ni a, Zirtawpni khan court hian central agency koh luh tur thu hi a siam a ni.
Mamata Banerjee-i sorkar chuan court-ah hian CBI koh luh kher a ngai lo ti mah se hnawlin a chhuitir ta a ni.