Ruihhlo leh a kaihhnawih do turin, a siruk lain aw
Ruihhlo kalkawnga awm kan ni a, khap nimahse khap rem a har hle. Tlawmngai pawl hrang hrangin theihtawpin do hna thawk mah se, vawiin thlengin man tur a la awm reng a, dan dik lova sumdawnna a hluar phah hle bawk.
High Level Drug Disposal Committee, Mizoram chuan Champhai Police-in ruihhlo an man Rs vaibelchhe 101 chuang man hu chu zirtawpni mai pawh khan Trinity Hospital Incinerator-ah an hal ral a. Ruihhlo halte hi Champhai Police-in kum 2019-2021 chhunga an man, Pseudoephedrine kg 238.90, Rs. 8,68,46,000 man hu leh Methamphetamine kg 30.90 Rs 93,24,30,000 man hu, a vaiin Rs.1,01,92,76,000 man hua chhut a ni.
Hei mah mah district pakhat atanga man chauh a la ni zawk a, a ram pum ang zawnga chhut phei chuan a tam dawn tih hi a chiang reng mai. Heti tak maia ruihhloin min bawhbuai leh min zimtawt ta mai hi sorkar atanga beihpui thlaka, dik lo chu do ngam a va hun tawh em.
Ruihhlo hal ralna hmuna tel Mizoram Police hotuten an tar lan danin, kumin January 1 atanga March 24 chhungin police-in heroin kg 4.748, Rs. 23,74,00,000 man hu an man tawh a, hemi kaihhnawihah hian mi 40 man an ni tawh bawk. Chu pawh heroin chauh a la ni zel bawk.
Ruihhlo hrang hrang hian min chiah hneh hle tawh a, ngun zawka chhut pheichuan kan chenchilh a ni ber tawh zawk a ni. Nasa zawka kan do a, tih tak zeta mahni theihna zawn theuh atanga kan do tlan a, kan vil hneh hi a va hun tawh em. I tang tlang mawlh teh ang u.