Israel chuan Arab League ram palia an foreign minister-te \heuh bakah United States secretary of state te inbiakna pawimawh leh hriat reng hlawh tur a thleng mek.
Tun \um hi United Arab Emirates (UAE), Morocco leh Bahrain minister \heuhte Israeli ram palaite an ram ngeia an kawm hmasak ber a ni.
Kum khat leh a chanve liam ta a\anga Israel ramin a \henawm hnaia Arab ramte nen inremna an neih hnua an inbiak vawi khatna a ni.
Egypt ram foreign minister pawhin inbiakna hi a zawm ve bawk ang.
Egypt hi Arab ram zinga Israel nena inremna siam hmasa ber niin kum 1979 daih tawhah khan an inrem tawh a, an inkar pawh a \ha viau.
Ram hrang hrang aiawhte hi Pathianni khan Israel chhim lam, Negev thlaler-a Sde Boker-a khualbukah an \hukhawm a, Thawh\anni hian inbiakna mumal zawk an nei ang.
|hutkhawm hi US Secretary of State Anthony Blinken-a’n heng lai vel a tlawh lai taka neih a ni.
Blinken-a hian Israel, West Bank, Morocco leh Algeria ramte chu a tlawh kual a. Ni nga thanga a zinnaah hian Russia-in Ukraine a rûn mek te, Iran nena an inkar leh Israel-Palestinian buaina chungchangte a sawipui hlawm.
Blinken-a hian Israeli Prime Minister Naftali Bennett leh Palestinian President Mahmoud Abbas te chu Ramallah-ah a kawm bawk.
Bennett-a nena an inkawm hi Israeli-ten US-in Iran chu nuclear programme a neih chungchanga inremna a siampui mai leh a hrek mekna a tihtawp an hlauh mek laia neih a ni.
US president hlui, Donald Trump-a khan kum 2015 khan Iran nen nuclear deal an neih chu titawpin Iran chu a hrek thar leh a. Inremnain a phal loh, nuclear ralthuam puah chu Iran-in a tih theih phah hlauh thung.
Bennett-a leh Blinken-a inbia hian Russia-in Ukraine a rûn mekah Israel chu buaina ching fel tura palai hna thawk tura hmahruaitu a nih theih dan tur chungchang pawh an sawi.
Israel hi Ukraine leh Russia nena inkungkaihna \ha tak nei niin Bennett-a hian hmachhanah leh telephone pawhin Russian President Vladimir Putin-a a be fo va, Ukraine-a indona awm mek tihtawp dan tur a sawipui tawh \hin.
Israel hlauhthawnna
Israel ram hian US leh Iran ramten inremna an ziak a nih chuan a hmaa mi aiin a nep/chak lo zawk ang a, Iran-in a chhehvela sipai lama inchhek muk a tumna a dodal zo lo vang tih a hlau.
Nuclear chungchanga inremna an ziak thei a nih chuan US hian Iran-a thiltithei tak, Islamic Revolution Guard Corps (IRGC)-te firfiak pawla a puan mek chu a hlip zui mai ang tih a hlau hle bawk.
IRGC hi Syria leh Yemen-a indona chawk thotua ngaih niin Gaza, Lebanon leh Syria-a Israel dodaltu firfiak pawlte pawlte puitua ngaih an ni bawk.
US Secretary of State Blinken-a hian the Israel-Palestinian inkara a thlir dan chu Bennett-a ngaihdan nen a inpersan hle bawk a. Palestinian ram din chu a pawm zawng a nih laiin Israeli prime minister hian a pawmpui ve thei lo.