Bengal-a thil thleng hi rorel lai leh eptuten nasa taka inbeih nan an hman phah a. Chief minister chuan ‘a phenah hian thil lian tak a awm’ ngei a rin thu a sawi.
“Hetiang thil rawng lutuk hi tun lai khawvelah Bengal-ah a thleng thei ang tih ka ring ngai lo. Nute leh an fate thah an ni a, in chhungkaw zinga mi an thi a, hei hi ka rilru tinatu a ni,” tiin Mamata Banerjee chuan thil thlenna hmun a tlawh tuma a tuartu chhungkua leh thiante bakah khaw miten an an hual thup karah a sawi.
A phenah hian inphiarna rapthlak tak a awm ngei a rin thu leh a titute chu na taka hrem an nih tur thu a sawi a, police-ten chhui theih dan hrang hrangin an chhui dawn tih a sawi.
Mamata-i sorkar hnuaia police chuan he thil thleng kaihhnawihah hian mi 20 vel an man tawh a, police officer pahnih chu an hna an thawh that loh avangin an hna atanga chawlh lailawktir an ni bawk.
An state-a eptu party, BJP chuan tualthahna thlengah hian rorel lai, Trinamool Congress party-a hruaitu thenkhat an inrawlh ngei niin an puh a. Saffron party hian TMC kaihhruai sorkar chu dan leh thupek kenkawhah a hlawhchham a, mipui an him loh em avangin an state chu President’s Rule hnuaia dah an phut bawk.