School luh a hnai, sorkar school lamah aw…
Covid-19 hri lengin min nuai na hle mai a, nunphung a khaihlak fe hnuah school session thar atangin Mizoram sorkar chuan dan pangngaia zirna school hawn tan leh a rel a, nunphung pangngaia kan let leh thei tur hi a lawmawm hle.
Tin, zirna hi kan ngaih pawimawh a ngai a, a bik takin sorkar school-te hi bawh uar lehzual tura tan kan lak pawh a tul hle awm e. Zirtirtu training chhuak leh thiamna tha tak tak enkawl an ni a, private school-te hnena pressure kan pe na ang bawk hian pe na ve ta ila zirna tha tunge kalpui lo bik ang? Fee awm lo leh senso tlem zawk bawk si hi pan uar tura kan infuih a, kan inzirtir thar leh hi a va ngai em.
School education minister Lalchhandama Ralte chuan kum 2023 academic session thar atangin primary, middle leh high school-ah uniform inang vek ha tura ruahman a nih thu sawiin, “Zirlaite chu school dangah insawn mah se, hautak lo zawka uniform ngai an rin theihna turin kan ti a ni,” a ti a, hei ringawt pawh hi thlamuanpui tham, hmasawnna a ni.
Sorkar in zirna a ngai pawimawh a, a zirlaite dinhmun thlenga a ngaihtuah hi a lawmawm a, ruahmanna an siamah pawh hian buaina leh harsatna tam tak thleng thei tur a veng ngei dawn. Zirtirtute pawhin inelna thianghlim leh inzir belh zel chunga ke an pen ve ngei a ngai tawh bawk ang. Chuvang chuan sorkar school lam hi kan bawh leh a, sum senral tur tam tak kan hum theihna tur hi chhungkaw tinin ngaihtuah thar leh ta ila a tha awm e.