Aizawl : Atal Mission for Rejuvenation and Urban Transformation (AMRUT) 2017-2019 kaltlanga Rs. nuai 230.73 senga siam -Chhawnzinga Lui water supply scheme- Chanmari West, Aizawl ami chu nimin khan Deputy chief minister, PHE Deptt. enkawltu ni bawk Tawnluia’n a hawng.
Chhawnzinga Lui water supply scheme hi Hunthar leh Edenthar Veng te bakah Chanmari West hmun thenkhata cheng mi 4200 vel chawm tura ruahman a ni a. Chanmari West mawngah Chhawnzinga lui pump house sak niin, Pump house atang hian Edenthar reservoir awm sa tui litre nuai 2 dawng leh AMRUT (2017-19) hnuaia sak Hunthar reservoir tui litre nuai 1.3 dawngah pump luh tur a nih thu sorkar thuchhuah chuan a tar lang.
Dy. Chief minister chuan Chhawnzinga lui chu tunhma chuan tuihna tha leh Aizawl khawpui pawhin an hriatlar a nih thin thu sawiin, mimal thahnemngai intelkhawmin kum 1960 chhovah Aijal water company dinin, he lui tui hi an khuap a, mipui hnenah an hralh thin tih a sawi a. Hunthar Venga Company peng pawh Aijal water company hming chawia phuah a nih thu sawiin, kum 1970-ah PHED-in leiin an enkawl chhunzawm tih a sawi bawk.
Tawnluia chuan Aizawl khawpui chawmtu phase-I leh phase-II atana khawl te a upat tawh avangin pipeline thlengin thawmthat a ngai tih sawiin, sorkarin theihtawp chhuahin hma a la a, khawl te an thlak bakah thawmthat ngaite an thawm tha tih a sawi a. Tunah chuan nitin tui litre maktaduai 28 atanga 30 pump theih a nih thu sawiin, hei hian mamawh a la phuhru zo lova, SIPMIU-in Tlawng lui tuilakna tur khawl an bun mek a, Aizawl Hmar lamin an chhawr tura ruahmanna siamin an thawk mek a tih a sawi.
Aizawl Chhim lam veng hmun hniam deuh chawm turin Tawi tlang atangin gravity-in tuilakna project thawh mek a ni tih pawh Tawnluia chuan sawiin, nakumah zawhfel theih beisei a nih thu a sawi a. Hemi hmang hian nitin tui litre maktaduai 15 pek theih beisei a nih thu a sawi bawk.
Sorkar thuchhuahin a tarlan danin, Chhawnzinga tuikhuah leh a ram chu kum 1938 velah hetih laia Bawrhsapin Chhawnzinga hnenah Fish Pond atan pass a pe a, Chhawnzinga te thianho chuan Aijal water company dinin, Chhawnzinga chuan sum thawh mai tur a neih ve loh avangin pawisa thawh ve aiah helai tuikhuah leh ram hi a thawh ta a, helai ram hi Aijal water company hmingin pass 29 of 1960 chu District council in a pe ta a. Kum 1970-ah PHE department-in Aizawl town emergency water supply atan a tangkai dawna hriain, Aijal water company hnen atanga lei dilin, an in berem a. Hetihlaia Aijal water company manager Chhawnzinga leh SDO PHE department Clement Lalrema ten November ni 30, 1970-ah inremna chu an ziak a ni.
Inremnna ang chuan “Sorkar pawisa kum 1970 – 1971 chhungin PHE-in Rs. 14,000 an pe anga, a bak Rs. 72,000 chu 1971 – 1972 chhungin an pe tla ang. Mizo district council Aizawl-in pass a lo pek tawh leh a panna kawng chu PHE department-in an nei nghal ang a, kawng leh a enkawl zui leh a senso pawh PHE department kutah a awm zui ang” tih a ni.