Palestinian pakhatin Israeli khawpui, Tel Aviv daiah mi panga a kap hlum leh a, hei hi chawlhkar khat lek chhunga an rama hetiang beihna vawi thum a thlenna a ni ta.
Thawhlehni zana beihna hi Bnei Brak-a thleng niin an rama ultra-Orthodox Jewish an tam berna hmun a ni.
A titu ber hi police-in an kap hlum niin a hmuna damdawi ina thawk awmten an sawi.
Israeli Arab-ten kar kalta Thawhlehni leh Pathiannia hetiang beihna an lo thlen tawhah mi paruk an thi a, hei vang hian venhim hna thawktute an inralring hle.
Israeli Prime Minister Naftali Bennett chuan an ram chuan ‘firfiaka chetna thawh thar’ an tawn mek thu a sawi.
Thlalaknaa thil thleng lo lak fuhah chuan silai hmet puaktu hi a duma inthuamin a M16 assault rifle ken chu mi chenna khawlaiah a kap a ni.
Israeli chanchinbute chuan eichawp dawr kawtah Ukrainian mipa pahnih a kap hlum hmasa niin an tar lang a. Car lo tlan lai chu lo kap lehin a khalhtu a kap hlum bawk.
Police pahnihin an pawmchilh hmain mipa pakhat a kap hlum leh hman a. An inbeihnaah hian officer pakhat zawk hian hliam na tak a tuar a, pakhat zawk hian a kap hlum ta a ni.
Magen David Adom ambulance service-a thawk, Menachem Englander chuan silai hmet puaktu nen hian an inhmachhawn hman a; mahse, a rifle a tan (jam) hlauh avangin a him niin a insawi.
Thi zinga pahnihte hi Israeli niin Bnei Brak-a cheng ve ve an ni a. Kum 29 mi, fa pakhat nei, Avishai Yehezkel leh kum 36 mi, fa panga nei, Yaakov Shalom te an ni.
Yehezkel-a unaupa chuan khawlaia a kal laiin kah a ni a, a taksaa indangin a naute pawm a dang niin Kol Chai radio a hrilh.
Police chuan officer thi hi kum 32 mi, Amir Khoury-a niin Israeli Arab a ni a. Police Commissioner Kobi Shabtai chuan a chhungte chuan ‘civil mi tam tak chhantu a ni a, pasal\ha a ni’ tiin an sawi tih a sawi.
Ukrainian embassy pawhin Ukrainian mi pahnih an thih thu an sawi a, an hming erawh an puang lo va, kum 20 leh 30 bawr an ni a. Engtia rei nge Israel-ah an chen tawh tih hriat a ni lo.
Bnei Brak-a thil thlenga silai hmet puaktu hi kum 27 mi, Diaa Hamarsheh a ni a, Israeli-ten an luah lai, West Bank-a hmar lama Yabad khuaa cheng a ni a. Bnei Brak-ah hian hna lo thawk tawhin tan inah pawh a lo tang tawh.
Hamarsheh-a chhungte zinga pathum hi Nilainia West Bank-a Israeli police-ten Palestinian panga an man zingah a tel a, chhuitute chuan he thil nen hian a chet dan hi a inzawm em tih an chhui zui mek.